ފުލެޓު ލިސްޓުގައި ހިމެނޭ އެކަކުވެސް އުނި ނުކުރުމަށް އެދި ރައްޔިތުންގެ މަޖުލީހަށް ހުށައެޅި ޕެޓިޝަން މިއަދު ރައްޔިތުންގެ މަޖުލީހުން ބޭރުކޮށްލައިފިއެވެ.
އަމިއްލަ ފަރާތަކުން ހުށައަޅާފައިވާ މި މައްސަލާގައި ބުނެފައިވަނީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ގެދޮރުވެރިޔާ ސްކީމުގެ ދަށުން ކުރިއަށް ގެންދިޔަ މަޝްރޫއުން ފްލެޓް ލިބޭނެކަމަށް މިނިސްޓްރީ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗާގެ ރަސްމީ ވެބްސައިޓްގައި ގެޒެޓް ކުރި ހުރިހާ ފަރާތްތަކާއި އަދި ކަމުގެ މަސްލަހަތު އޮތް އެންމެހައި ފަރާތްތަކުގެ ފްލެޓްތައް ބާތިލު ނުކުރުމަށް އެދިފައެވެ. މި މައްސަލާގައި މިއަދު ޕެޓިޝަން ކޮމެޓީން ނިންމީ މި ޕެޓިޝަނުގެ މަސައްކަތް ކުރިއަށް ނުގެންދިއުމަށެވެ.
މި ޕެޓިޝަނުގެ މަސައްކަތް ކުރިއަށް ނުގެންދިއުމަށް ހުށައެޅުއްވީ ހެންވޭރު އުތުރު ދާއިރާގެ މެމްބަރު އަހުމަދު އައިފާނެވެ. އައިފާނުގެ ހުށައެޅުމަށް ތާއިދު ކުރެއްވީ އުނގޫފާރު ދާއިރާގެ ޕީއެންސީ މެމްބަރު އިބްރާހިމް ޝިފާޒެވެ.
ޕެޓިޝަންގެ މަސައްކަތް ކުރިއަށް ނުގެންދަން ހުށަހަޅުއްވަމުން، މެންބަރު އައިފާން ވިދާޅުވީ، އެ ޕެޓިޝަނަކީ 19 ވަނަ މަޖިލީހަށް ހުށަހަޅައިގެން ކުރިއަށް ގެންދިޔަ މަސައްކަތެއް ކަމަށެވެ. އެ މައްސަލައާ ގުޅިގެން ކޮމިޓީއަށް އެންމެ ފަހުން ހައުސިން މިނިސްޓަރު ޑރ. އަލީ ހައިދަރު ހާޒިރުވެވަޑައިގެން ކުރެއްވި ސުވާލުތަކުން، އެ ކަމުގައި ދިމާވެފައިވާ މައްސަލަ ވަރަށްބޮޑަށް ސާފުވެފައިވާ ކަމަށް އޭނާ ވިދާޅުވިއެވެ.
އެ މައްސަލައަކީ ފްލެޓް ލިސްޓު އިއުލާންކުރިއިރު، ޝައްކު އުފެދޭ ކަންތައްތަކެއް ހުރި ކަމަށްބުނެ، ފްލެޓު ދިނުން މަޑުޖައްސައިލުމަށް އެންޓިކޮރަޕްޝަން ކޮމިޝަން (އޭސީސީ) އިން ދިން ލަފަޔާ ހިލާފަށް ކުރީގެ ސަރުކާރުން އެކަން ކުރިއަށް ގެންދިއުން ކަމަށްވެސް މެންބަރު ވިދާޅުވިއެވެ.
މި ޕެޓިޝަން ކޮމެޓިން ކުރިއަށް ނުގެންދިއުމަށް ޕެޓިޝަން ކޮމެޓީގެ 9 މެމްބަރުންގެ ތެރެއިން 7 މެމްބަރުން ތާއިދު ކުރެއްވިއެވެ. ތާއިދުކޮށް ވޯޓުދެއްވީ މުޅިންވެސް ސަރުކާރަށް ނިސްބަތްވާ ޕީއެންސީގެ މަޖުލިސް މެމްބަރުންނެވެ.
