މާލެއާއި ހުޅުމާލޭގެ އެކި ހިސާބުތަކުން ބުޅާ ހިފައި، އޭގެއިން ކާބޯތަކެތި ތައްޔާރުކުރުމުގެ ތުހުމަތުގައި އިމިގްރޭޝަނުން ހޯދަމުން އައި ބަންގްލަދޭޝް ގެ އަރަފާތު ހުސައިން މިއަދު ފުލުހުން ހައްޔަރުކޮށްފިއެވެ.
ސޯޝަލް މީޑިއާގައި އެ މީހާގެ މައްސަލަ އާންމުން ސަމާލު ކަމަށް ގެނައުމުން އިމިގްރޭޝަނާއި ޕޮލިހުން ވެސް ވަނީ އޭނާ ހޯދުމުގެ މަސައްކަތް ފަށާފައެވެ.
އިމިގްރޭޝަނުން މައުލޫމާތުދޭ ގޮތުގައި އެ މީހާ ހޯދާފައިވަނީ އިމިގްރޭޝަނަށް ލިބުނު އިންޓެލިޖެންސް ރިޕޯޓަކާއި ގުޅިގެން ފުލުހުންގެ އެހީތެރިކަމާއެކުގައެވެ. އޭނާ ހައްޔަރުކޮށްފައިވަނީ މިއަދު ހެނދުނު 10.30ހާއިރު ދިލްބަހާރު މަގު ބޯކޮށާ ތަނަކުންނެވެ.
އެ މީހާއާ ގުޅޭ މައުލޫމާތު އާންމުވުމާ އެކު އާންމުންގެ ގިނަ ބަޔަކު ވަނީ އެ ކަމާ ވަރަށް ބޮޑަށް ނުރުހުން ފާޅުކުރަން ފަށައިފައެވެ. އެގޮތުން، އޭނާ ކާބޯތަކެތި ވިއްކީ ކޮން ތަނެއްގައިތޯ، ކިހާ ދުވަހަކުތޯއާއި ހުރިހާ މައުލޫމާތެއް ކަމާ ގުޅުންހުރި އިދާރާތަކުން ހާމަކުރަން ގިނަ ބަޔަކު ވަނީ ގޮވާލައިފައެވެ.
އަރަފާތު ހުސައިން މަސައްކަތް ކުރަމުންދަނީ ގަވައިދާ ހިލާފަށް މާލޭ ވަޅޯމަސް މާރުކޭޓުގައެވެ. އޭނާ ކާބޯތަކެތި ވިއްކަމުން އައީ ލޯންޗު ފަހަރާއި އެނޫންވެސް އޯޑަރަށް ޑެލިވެރީކޮށްދޭ ހިދުމަތެއްގެ ގޮތުގައެވެ. އޭނާ ކާބޯތަކެތި ހަދަމުން އައީ ދިރިއުޅޭ ތަނުގައެވެ. އާއްމު ފަރާތަކުން ސޯސަލް މީޑިއާއަށް ހިއްސާކޮށްފައިވާ ވީޑިއޯއެއްގައި ބުނާ ގޮތުން އަރަފާތު ހުސައިން ދިރިއުޅޭ ސަރަހައްދުން ބުޅާ ރޯ އަޑު އިވޭ ކަމަށް އާއްމުން މައުލޫމާތުދޭ ކަމަށެވެ. އަދި އޭނާ ބުޅާ ހިފައިގެން ގެންދާ މަންޒަރާއި، ބުޅަލުގެ ބައެއް ގުނަވަންތައްވެސް އޭނާ ކާބޯތަކެތި ތައްޔާރުކުރާ ތަނުން ފެނިފައިވާ ކަމަށްވެއެވެ.
މި މައްސަލާގައި އިމިގްރޭޝަނާއި އަދި ފުލުހުންވެސް ރަސްމީކޮށް އެއްވެސް މައުލޫމާތެއް ނުދެއެވެ.
