ގދ. އަތޮޅުގައި އޮންނަ ރަފެލްސް މޯލްޑިވްސް ރިސޯޓުން އިއްޔެ ގެއްލުނު ބިދޭސީ މުއައްޒަފު ފެނިއްޖެއެވެ.
އެމްއެންޑީއެފުން މައުލޫމާތުދޭ ގޮތުގައި ރަފެލްސް ރިސޯޓުގެ ދޯނީގައި މަސައްކަތް ކުރާ ބަންގްލަދޭޝް މީހާ ފެނުނީ، ގއ. އަތޮޅުގެ ރިސޯޓަކަށް މިއަދު އަރާ ހުއްޓާ ކަމަށެވެ. އެ މީހާ ހޯދީ ރިސޯޓުގެ މުއައްޒަފުން ކަމަށާއި އޭނާގެ ހާލު ރަނގަޅު ކަމަށްވެސް އެމްއެންޑީއެފުން މައުލޫމާތުދެއެވެ.
އޭނާ ގެއްލިގެން ފުލުހުންނަށް ހުށަހެޅީ އިއްޔެ މެންދުރު ފަހު 3:30 ހާއިރެވެ. ރިސޯޓުން އޭރު ބުނާ ގޮތުން އޭނާ ދިޔައީ ކަޔެކެއްގައި މޫދަށެވެ.
މުޅި ރާއްޖެއަށް މޫސުން ގޯސްވެފައިވާތީ ކަމާގުޅޭ ފަރާތްތަކުން ވަނީ ކަނޑުދަތުރު ކުރާއިރު ސަމާލުކަން ދިނުމަށާއި ރޭގަނޑު ދަތުރުފަތުރު ނުކުރުމަށްވެސް ވަނީ އިލްތިމާސްކޮށްފައެވެ.
