ތިލަފުށިން ފުރައިގެން މ.މެދުފުށި ރިސޯޓަށް ދަތުރުކުރަމުން ދަނިކޮށް ގެއްލުނު ’ތްރީ-37‘ ދޯނި މިއަދުގެ ވަގުތެއްގައި ފެނިއްޖެއެވެ.
ކޯސްޓުގާޑުން މައުލޫމާތުދޭ ގޮތުގައި އެ ދޯނިން ވަނީ ކޯސްޓުގާޑަށް ގުޅައި ދޯނި އޮތް ސަރަހައްދުގެ މައުލޫމާތުދީފައެވެ. ކޯސްޓު ގާޑު ޝަހީދުއަލީ މިހާރު އެ ދިމާއަށް ދަތުރުކުރަމުންދާ ކަމަށްވެސް އެމްއެންޑީއެފުން މައުލޫމާތުދެއެވެ.
މިދިޔަ ހުކުރު ދުވަހު ތިލަފުށިން މުދާ ބަރުކޮށްގެން 4 މީހުންނާ އެކު ގެއްލުނު ދޯނީ ގެއްލުނީ އަޑީތެޔޮ ހުސްވެ، އިންޖީނު ހުއްޓުމާ ގުޅިގެންނެވެ. މި ދޯންޏާއި ގުޅުނު އިރު ދޯނި އޮތީ ވ.ފޮއްތެޔޮ ބޭރުގައި ނަގިލި ލައިގެންނެވެ. ދޯނިން ދަތުރުކުރި 4 މީހުންގެ ހާލުވެސް ރަނގަޅެވެ.
މި ދޯނި ހޯދުމަށް އެމްއެންޑީއެފުން ވަނީ މޯލްޑިވިއަންގެ ސީޕްލޭނެއް ބޭނުންކޮށްގެން މ.އަތޮޅުގެ ބޮޑު ސަރަހައްދެއް ބަލާފައެވެ. ނަމަވެސް ދޯނި ފެނުނީ އެ ސަރަހައްދާއި މާ ދުރުން ވ.އަތޮޅުންނެވެ.
