ރޯދަމަސް ތެރޭގައި ރައްޔިތުންގެ މަޖުލީހުގެ އިންތިހާބު ބޭއްވުމަށް މަޖުލީހުގެ ކޮމެޓީން ރުހުން ދިން ކަމަށާއި، އޭރުގެ ކޮމެޓީގެ ރޫހު ހުރީވެސް ރޯދަމަސް ތެރޭގައި އިންތިހާބު ބޭއްވުމަށްކަމަށް އިލެކްޝަން ކޮމިޝަނުގެ ރައީސް ފުއާދު ތައުފީގު ދެއްކި ވާހަކަތައް މަޖުލިސް މެމްބަރުންނާއި ސިޔާސީ ޕާޓީތަކުގެ ބައެއް އިސްބޭފުޅުން ދޮގުކޮށްފިއެވެ. އިލެކްޝަން ކޮމިޝަނުގެ ލަފާދޭ ކޮމެޓީގެ ބައްދަލުވުމުގައި ފުއާދު ދެއްކެވި ވާހަކަތައް ކުއްވެރިކުރަމުން އެމްޑީޕީގެ ޑެޕއިުޓީ ޗެއަރޕަސަން އިބްރާހިމް ވަހީދު ވިދާޅުވީ މިއަދުގެ ބައްދަލުވުމުގައި ފުއާދު ހެއްދެވީ ވަރަށް ބޮޑު ދޮގެއް ކަމަށާއި މަޖުލީހުގެ ކޮމެޓީގައިވެސް އަދި މީގެ ކުރިން އިލެކްޝަން ކޮމިޝަނުން ބޭއްވި ބައްދަލުވުންތަކުގައިވެސް ރޯދަމަހު އިންތިހާބު ބޭއްވުމަށް އެއްބަސްވެފައި ނުވާނެ ކަމަށެވެ. އޭގެ ބަދަލުގައި މަޖުލީހުގެ ކޮމެޓިންނާއި އިލެކްޝަން ކޮމިޝަނަށް ލަފާދޭ ކޮމެޓިން ދަންނަވާފައިވާނީ ގާނޫނު ބަދަލު ނުކޮށްވެސް ރޯދައިގެ ފަހުން މަޖުލިސް އިންތިހާބު ބޭއްވިދާނެ ކަމަށެވެ. އިލެކްޝަން ކޮމިޝަނުގެ ރައީސް ފުއާދު އޭރުވެސް އެކި އުޒުރުތައް ދެެއްކެވި ކަމަށާއި ރޯދައިގެ ފަހުން ސްކޫލު ހޯލުތައް ލިބުމުގެ ދަތިކަމާއި ސިވިލް ސަރވިސް މުއައްޒަފުން ހޯދަންވެސް ދަތިވެދާނެ ކަމަށް ދިޔައީ ބުނަމުން ކަމަށެވެ.
މުއައްސަސާތަކުން ތަކުރާރުކޮށް ދެކޮޅު ހެދުމުންވެސް ފުއާދު ގޮތް ދޫނުކޮށް ރޯދަމަހު ތެރޭގައި އިންތިހާބު ބާއްވަން ނިންމުމުން އޭގެ ފަހުން އިލެކްޝަންގެ ބައްދަލުވުމުގައި އެމްޑީޕީން ބައިވެރިނުވާ ކަމަށްވެސް އިބުރޭ ވިދާޅުވިއެވެ. އެމްޑީޕީން ތުހުމަތު ކުރަނީ ރައީސް މުއިއްޒުގެ އެދިލެއްވުމަށް އިސީގެ ރައީސް ނިންމަވައިގެން އުޅެނީ ސިޔާސީ ނިންމުމެއް ކަމަށެވެ.
މިއަދުގެ ބައްދަލުވުމުގައި ސިވިލް ސަރވިސް ކޮމިޝަނުންވެސް ލަފާދެއްވީ ރޯދައިގެ ފަހުން އިންތިހާބު ބޭއްވުމަށެވެ. ސީއެސްސީގެ އިތުރުން ދަ ޑިމޮކްރެޓްސް ޕާޓީންވެސް ލަފާދީފައިވަނީ ރޯދައިގެ ފަހުން އިންތިހާބު ބޭއްވުމަށެެވެ. މި ގޮތަށް ލަފާ ދެއްވުމުން ފުއާދު ތައުފީގު ވަރަށް ބޮޑަށް ކޯފާވެ، ރޯދައިގެ ފަހުން އިންތިހާބު ބޭއްވުމަށް ތަކުރާރުކޮށް، ވަރަށް ބޮޑަށް ދެކޮޅު ހައްދަވަމުން ގެންދެވިއެވެ.
ރައްޔިތުންގެ މަޖުލީހުން ގާނޫނަށް ބަދަލެއް ގެނެސް ރޯދައިގެ ފަހަށް އިންތިހާބު ބާއްވަން ހަމަޖެއްސީވެސް އީސީގެ ރައީސް ފުއާދު ތައުފީގު ތަކުރާރުކޮށް މަޖުލީހުގެ ލަފާ އަށް އަމަލުކުރަން ދެކޮޅު ހެއްދެވުމުންނެވެ. މަޖުލީހުގެ މެމްބަރުން ބުނަނީ ރޯދަމަހު އިންތިހާބު ބޭއްވުމުން ވަރަށް ގިނަ ބަޔަކު ވޯޓުލާން ނުނިކުތުމުގެ ފުރުސަތު އޮންނާނެ ކަމަށާއި، އެކަމަށް ހިތްވަރުދޭ ބަޔަކަށް އީސީވެސް މަޖުލިސްވެސް ބޭނުން ނުވާނެ ކަމަށެވެ.
ރައީސް މުއިއްޒާއި ޕީއެންސީން ރޯދަމަހުގެ ތެރޭގައި އިންތިހާބު ބޭއްވުމަށް ތާއިދު ކުރުމުން އެކަމަށް އީސީގެ ރައީސް ފުއާދު ނިންމެވީ އެކަމުގައި ފުއާދަށް ސިޔާސީ މަންފާއެއް ލިބޭތީ ކަމަށް ބައެއް އިދިކޮޅު ފަރާތްތަކުން ތުހުމަތު ކުރެއެވެ. މިގޮތުން އަލަށް ހުޅުވި ތުރުކީ އެމްބަސީގެ އެމްބެސެޑަރުގެ މަގާމަށް ފުއާދު އައްޔަންކުރަން ނިންމާފައިވާ ކަމަށްވެސް ބައެއް ފަރާތްތަކުން ބުނަމުންދެއެވެ. މީގެ އިތުރުން މިފްކޯގެ އެމްޑީއަކަށްވެސް ރައީސް މުއިއްޒު އައްޔަންކުރައްވާފައިވަނި ފުއާދު ތަގުފީގުގެ މަސްލަހަތު އޮންނަ ވިޔަފާރީގައި ބައިވެރިވާ ފަރާތެކެވެ.
މި އަހަރުގެ ރިޔާސީ އިންތިހާބުގައިވެސް ފުއާދު ތައުފީގު ވަރަށް ފާޅުގައި ވަނީ އޭރުގެ ރައީސް އަދި އެމްޑީޕީގެ ރިޔާސީ ކެންޑީޑޭޓު ރައީސް އިބްރާހިމް މުހައްމަދު ސޯލިހާއި ދެކޮޅަށް މަސައްކަތް ކުރައްވާފައެވެ. އެކަމުގެ ސަބަބުން އިލެކްޝަން ކޮމިޝަނުގެ މެމްބަރުންނާއި ފުއާދާއި ދެމެދު މައްސަލަޖެހި ބައެއް ބައްދަލުވުންތައްވެސް މެމްބަރުން ދިޔައީ ހާޟިރުވުމަށް ދެކޮޅު ހަދަމުންނެވެ. އެ ދުވަސްވަރު އީސީގެ ބައްދަލުވުންތަކުގެ ރިޔާސަތު ބެލެހެއްޓެވި ނައިބު ރައީސް އިސްމާއިލް ހަބީބެވެ.
