ދިވެހިރާއްޖޭގެ އެންމެ ބޮޑު ސިޔާސީ ޕާޓީ އަދި އެންމެ ގިނަ ދުވަސްވީ ސިޔާސީ ޕާޓީ އެމްޑީޕީގެ ރައީސްގެ މަގާމު އަބްދުﷲ ޝާހިދަށް ލިބިވަޑައިގެންފިއެވެ.
ކުރީގެ ފޮރިން މިނިސްޓަރ ޝާހިދު މި މަގާމު ކާމިޔާބު ކުރެއްވީ ރައީސް ކަމުގެ މަގާމަށް ވާދަކުރުމަށް ހުޅުވާލުމުން އިތުރު ކެންޑީޑޭޓެއް ވާދަ ނުކުރުމުން އިންތިހާބަކާއި ނުލައެވެ. އެމްޑީޕީގެ ރައީސްކަމުގެ މަގާމުގައި ހުންނެވީ ކުރީގެ ރައީސް މުހައްމަދު ނަޝީދެވެ. އެމަނިކުފާނު ރައީސްކަމުން އިސްތިއުފާ ދެއްވުމަށް ފަހު ޕާޓީންވެސް ވަކިވެ މިހާރު ސިޔާސީ މަސައްކަތް ކުރައްވަނީ ޑިމޮކްރެޓްސް ޕާޓީގައެވެ. ނަޝީދު އިސްތިއުފާ ދެއްވުމުން ޕާޓީގެ ވަގުތީ ރައީސްގެ މަގާމުގައި ހުންނެވީ ކުރީގެ ރައީސް އިބްރާހިމް މުހައްމަދު ސޯލިހެވެ.
ރައީސް ސޯލިހުގެ ސަރުކާރުގައި ފޮރިން މިނިސްޓަރު ކަން ޝާހިދު ކުރެއްވިއިރު އދ. ގެ އާންމު މަޖިލީހުގެ ރައީސް ކަން ވެސް އޭނާ ވަނީ ކުރައްވައިފަ އެވެ.
ޝާހިދަށް އެމްޑީޕީގެ ރައީސްގެ މަގާމު ކަށަވަރުވުމާއި ގުޅިގެން މިއަދު އެކްސްގައި ކުރެއްވި މެސެޖެއްގައި ވިދާޅުވީ ”الله ސުބްޙާނަހޫ ވަތަޢާލާގެ މަތިވެރި ޙަޟްރަތުން ވާގި އެދިހުރެ، ދިވެހި ރައްޔިތުންގެ ޑިމޮކްރަޓިކް ޕާޓީގެ ރައީސްކަމުގެ ޒިންމާއާއި އަޅުގަނޑު ހަވާލު މިވަނީ ޕާޓީގެ މެމްބަރުންގެ ފުރިހަމަ އިތުބާރާ އެކު އާބާރެއްގައި އަޅުގަނޑުމެންގެ ޕާޓީ ކުރިއަށް ގެންދަން. އިރާދަ ކުރެއްވިއްޔާ ދިވެހި ޤައުމާއި ދިވެހި ރައްޔިތުންގެ އުންމީދުތަކަށް އެމް.ޑީ.ޕީ ކާމިޔާބު ހޯދާނެކަމަށެވެ. ”
އެމްޑީޕީގެ ލީޑަރޝިޕުގެ ގިނަ ބައެއްގެ ތާއިދު ޝާހިދަށް ވަނީ ލިބިފައެވެ. މި ގޮތުން އެމްޑީޕީ ސަރުކާރުގެ ވަޒީރުންނާއި މަޖުލިސް މެމްބަރުންވެސް ވަނީ ޝާހިދަށް ތައުރީފުކޮށް ވާހަކަ ދައްކާފައެވެ.
