މިނިސްޓްރީ އޮފް އެގްރިކަލްޗާ އެންޑް އެނިމަލް ވެލްފެއާގެ ސްޓޭޓް މިނިސްޓަރު ހުސައިން އިސްމާއީލް މަގާމުން ވަކިކުރައްވައިފި އެވެ.
ވޭތުވެދިޔަ ދުވަސްތަކުގައި، މިނިސްޓަރ ޑރ.އައިޝަތު ރަމީލާ ކެންސަރުގެ އާލާސްކަންފުޅަކަށް ރާއްޖެއިން ބޭރުގައި ފަރުވާ ހޯއްދެވުމަށް ހުންނެވުމުން މިނިސްޓްރީ ހިންގެވި ހުސެއިން ވަކިކުރެއްވީ ކުއްލިއަކަށް ވަކި ސަބަބެއްވެސް ބަޔާން ނުކޮށް ކަމަށް ހުސެއިންއާއި ހަވާލާދީ މިނިސްޓްރީގެ އޮފިޝަލަކު ވިދާޅުވިއެވެ. މިނިސްޓްރީގެ އޮފިޝަލު ވިދާޅުވީ ރޭގެ ވަގުތެއްގައި ފޯނުކޯލަކުން ހުސެއިން މަގާމުން ވަކި ކުރި ކަމަށް ދަންނަވަން ރައީސް އޮފީހުން ވިދާޅުވި ކަމަށާއި މިއަދު ހެނދުނު ރަސްމީކޮށް ސިޓީއަކުން އެކަން ހުސެއިންވަނީ އަންގާފައެވެ. އެ ސިޓީގައި ބަޔާންކޮށްފައިވަނީ ރައީސުލްޖުމްހޫރިއްޔާއަށް ލިބިދޭ ބާރުގެ ދަށުން މިނިސްޓްރީ އޮފް އެގްރިކަލްޗަރ އެންޑު އެނިމަލް ވެލްފެއަރ ގެ ސްޓޭޓް މިނިސްޓަރުކަމުން ހުސެއިން އިސްމާއިލު ވަކިކޮށްފައިވާ ކަމަށެވެ.
ހުސެއިން ނިސްބަތްވަނީ ކާނަލް ނާޒިމްގެ އެމްއެންޕީއަށެވެ. އެ ޕާޓީގެ ނައިބު ރައީސެއްގެ ގޮތުގައި ހުރި ހުސެއިންގެ އިތުރުން އެމްއެންޕީގެ އިސް މަގާމުތަކުގައި ތިއްބެވި ހުރިހާ ފަރާތްތަކަށް ވަނީ މި ސަރުކާރުން ސިޔާސީ މާގުތައް ދެއްވާފައެވެ. އެމްއެންޕީއަކީ ވެރިކަންކުރާ ޕީއެންސީގެ ކޯލިޝަން ޕާޓްނަރެކެެވެ.
މިނިސްޓްރީ އޮފް އެގްރިކަލްޗާ އެންޑް އެނިމަލް ވެލްފެއާ ގެ ސްޓޭޓް މިނިސްޓަރުގެ މަގާމުން ހުސައިން އިސްމާއީލް ވަކިކުރެއްވުމާ ގުޅިގެން އެ މިނިސްޓްރީގައި ސްޓޭޓް މިނިސްޓަރުންގެ ގޮތުގައި އަދިވެސް ދެ ބޭފުޅަކު އެބަތިއްބެވި އެވެ. އަދި ތިން ޑެޕިއުޓީ މިނިސްޓަރުންވެސް އެބަތިއްބެވި އެވެ.
