ވެރިކަންކުރާ ޕީޕީއެމް ޕީއެންސީން ރައްޔިިތުންގެ މަޖުލީހަށް ވާދަކުރާ ކެންޑީޑޭޓުންގެ މެދުގައި ބޭއްވި ޕްރައިމަރީގައި ގދ.ގައްދޫ ދާއިރާގެ ޕްރައިމަރީ ކާމިޔާބުކުރީ މަހުމޫދު ޝަފީގު (މަހާ) އެވެ. ވަރުގަދަ ކެމްޕޭނެއް ކޮށްގެން ޕްރައިމަރީ ކާމިޔާބުކޮށް އެކަމުގައި އުފާ ފާޅުކުރުން ނުނިމެނީސް ރައީސް ޑރ.މުއިއްޒު ތާއިދުކުރައްވާ ކެންޑީޑޭޓެއް ކަމަށް ބުނަމުން އައީ ރައްޔިތުންގެ މަޖުލީހަށް އަމިއްލަ ގޮތުން ވާދަކުރަން ނިންމާފައިވާ މުހައްމަދު އަލީއެވެ.
ގައްދޫ ދާއިރާއިން ވާހަކަދެއްކީ މީހަކު ބުނީ، ސަރުކާރު ކެންޑީޑޭޓަކީ މުހައްމަދު އަލީ ކަމަށް އަމިއްލައަށް ބުނަމުން ދިޔަސް އެކަން ގަބޫލުނުކޮށް މަހާ ގެ ޓީމުން އައީ އިންތިހާބަށް ވަރަށް ބޮޑަށް ތައްޔާރުވަމުންނެވެ. ނަމަވެސް އެ ތައްޔާރީތައް ހުއްޓާލަން ޖެހުނީ ކުއްލި ނުރަސްމީ ދަތުރުފުޅެއްގައި ސަރުކާރުގެ ދެ މިނިސްޓަރަކު ގައްދޫއަށް ވަޑައިގެން އަމިއްލަ ގޮތުން ކުރިމަތިލާފައިވާ މުހައްމަދު އަލީގެ ކެމްޕޭނުގައި ހަރަކާތްތެރިވުމުންނެވެ. މުހައްމަދު އަލީއަށް ތާއިދުކުރަން ނިންމެވީ އިސްލާމިކް މިނިސްޓަރ ޑރ.މުހައްމަދު ޝަހީމާއި އެޑިއުކޭޝަން މިނިސްޓަރ ޝަފީއުއެވެ. މިނިސްޓަރ ޝަފީއުއަކީ މުހައްމަދު އަލީގެ އާއިލީ ބޭފުޅެކެވެ.
މަހާ ކެމްޕޭނުގައި ހަރަކާތްތެރިވި ގައްދޫ މީހަކު ބުނީ މަހާއަށް ދިމާވި ފަދަ ލަދުވެރިކަމެއް އެހެން ކެންޑީޑޭޓަކަށް ދިމާވާން ބޭނުން ނުވާ ކަމަށާއި ޕާޓީން އިތުބާރު ނުކުރާ މީހެއް ކަމަށް، ޕްރައިމަރީގެ ކުރިން ބުނަން ޖެހޭނެ ކަމަށެވެ.
މުހައްމަދު ޝަފީގު (މަހާ) ވާދަ ނުކުރަންނިންމުމުން ގައްދޫ ދާއިރާގެ ޓިކެޓު ވަނީ މުހައްމަދު އަލީއަށް ލިބިފައެވެ. ގައްދޫ ދާއިރާއަށް 4 ކެންޑީޑޭޓުން ވާދަކުރެއެވެ. އެއީ:
މުހައްމަދު އަލީ (ޕީއެންސީ)
އަހުމަދު ޒާހިރު (ޑިމޮކްރެޓްސް) މިހާރުގެ ވެސް މެމްބަރު
އަހުމަދު ސައީދު މުހައްމަދު (އެމްޑީޕީ) ފެނަކައިގެ ކުރީގެ އެމްޑީ
އަހުމަދު ޝާހުބާދު (އަމިއްލަ ގޮތުން)
