އިންޑިއާއިން ރާއްޖެއަށް ކޮވިޝީލްޑް ވެކްސިންގެ އިތުރު 100،000 ޑޯޒް މިއަދު ހަދިޔާކޮށްފި އެވެ.
މި އެހީ ހަވާލުކުރުމަށް މއަދު ފޮރިން މިނިސްޓްރީގައި އޮތް ރަސްމިއްޔާތެއްގައި، ރާއްޖޭގެ ފަރާތުން ސޮއިކުރެއްވީ ހެލްތު މިނިސްޓަރު އަހުމަދު ނަސީމެވެ. އިންޑިއާއިން ސޮއިކުރެއްވީ ރާއްޖޭގައި ހުންނަވާ ސަފީރު ސަންޖޭ ސުދިރް އެވެ.
މި ރަސްމިއްޔާތު އޮތީ މިއަދު ރާއްޖެ ވަޑައިގެންނެވި އިންޑިއާގެ ފޮރިން މިނިސްޓަރު ޑރ. ސުބްރަމަންޔަން ޖައިޝަންކަރުގެ ހާޒިރުގަ އެވެ. އޭނާގެ އިތުރުން ރާއްޖޭގެ ފޮރިން މިނިސްޓަރު އަބްދުﷲ ޝާހިދު ވެސް އިންނެވި އެވެ.
މިހާރުވެސް ރާއްޖޭގައި ޖަހަމުން ދަނީ އިންޑިޔާއިން ހަދިޔާކުރި ކޮވިޝީލްޑު ވެކްސިންއެވެ. މި އާ އެހީގެ ސަބަބުން ރާއްޖޭގެ ވެކްސިން ޕްރޮގްރާމަށް ވަރަށް ބޮޑު ފަސޭހައަކާއި ކުރިއެރުމެއް ލިބޭނެ ކަމަށް ބެލެވެ އެވެ. ސަރުކާރުން ނިންމާފައި ވަނީ މިހާރު ލިބިފައި ހުރި 100،000 ވެސް ވީހާވެސް އަވަހަށް ޖަހާށެވެ. ދެ ވަނަ ޑޯޒްގެ ކަންކަން ކުރިއަށް ގެންދާނީ ފަހުން ކަމަށް ވެސް ސަރުކާރުން ބުނެފައިވެ އެވެ.
