މި ސަރުކާރުން ހުޅުމާލެއިން ގޯތި ދީފައިވާ ކަމަށް ބުނެ ދިޔަރެސް ނޫހުން ފަތުރަނީ ދޮގު ހަބަރެއް ކަމަށް ޑރ. އިޔާޒް ވިދާޅުވެއްޖެއެވެ. އަދާލަތު ޕާޓީއަށް ނިސްބަތްވާ ދީނީ އިލްމުވެރިޔާ ޑރ އިޔާޒް މިހެން ވިދާޅުވީ ދިޔަރެސް ނޫހުގައި މިއަދު ގޯތި ދިނުމާ ބެހޭގޮތުން ފަތުރަމުންދާ ހަބަރާއި ހަވާލާދެއްވައެވެ. ދިޔަރެސް ނޫހުން ބުނާ ގޮތުން މި ސަރުކާރުން ބައެއް މީހުންނަށް ވަނީ ގުރުއަތާއި ނުލާ ހުޅުމާލެއިން ގޯތި ދީފައެވެ. މި ގޮތުން ޑރ. އިޔާޒަށްވެސް ވަނީ ހުޅުމާލެއިން ގޯތި ދީފައިވާ ކަމަށާއި މި ގުރުއަތުތައް ނަގާފައިވަނީ ހައުސިން މިނިސްޓްރީގެ އޮފިޝަލުން ކަމަށެވެ.
މި ކަމަށް ރައްދު ދެއްވައި ޑރ. އިޔާޒް ވިދާޅުވެފައިވަނީ މި ސަރުކާރަކުންވެސް އަދި އެހެން ސަރުކާރަކުންވެސް ގޯއްޗެއް، ފްލެޓެއްވެސް ލިބިފައިވާ ނުވާ ކަމަށެވެ. އެހެން ކަމުން ދޮގު ވާހަކަ ނުފެތުރުމަށް އެމަނިކުފާނުވަނީ އިލްތިމާސް ކުރައްވާފައެވެ.
އިދިކޮޅު ޕީޕީއެމަށް ނިސްބަތްވާ ދިޔަރެސް ނޫހުގައި ބުނެފައިވާ ގޮތުގައި ވަކި ބަޔަކަށް ވަކި ތަނަކުން ގޯތި ލިބޭ ގޮތަށްވެސް ގުރުއަތުލުން ވަނީ ތަރުތީބުކޮށްފައެވެ. ގެދޮރުވެރިކަމުގެ ސިޔާސަތުގެ ތެރެއިން މާލޭ ރައްޔިތުންނަށް ދޫކުރާ ގޯތި ގުރުއަތުލާފައިވާ ގޮތަށް ދިޔަރެސް ނޫހުން ފަތުރަމުންދާ މި ހަބަރުތައް ހައުސިން މިނިސްޓްރީއާއި ގޯތި ގުރުއަތުގައި ބައިވެރިވި ފަރާތްތަކުންވެސް ދަނީ ދޮގު ކުރަމުންނެވެ
