ކ. ތިލަފުށިން ފުރައިގެން މ. މެދުފުށި އައިލެންޑް ރިޒޯޓަށް ދަތުރުކުރަމުންދިޔަ މުދާ އުފުލާ ދޯނި ހޯދުމަށް ޑްރޯން ބޭނުން ނުކުރާ ސަބަބު އެމްއެންޑީއެފުން ސިއްރުކޮށްފިއެވެ.
4 ފަޅުވެރިންނާ އެކު އިއްޔެގެ ވަގުތެއްގައި ގެއްލުނު ’AAA-37‘ ދޯނީގެ ހަބަރެއް މިއަދާ ހަމައަށް ނުވާއިރު، ދޯނީގެ އެއްވެސް ނިޝާނެއްވެސް ކަނޑުމަތިން މިހާތަނަށް ފެނިފައި ނުވެއެވެ. އެމްއެންޑީއެފުން ބުނަނީ ދޯނި ހޯދުމަށް ބޭނުން ކުރަމުންދަނީ އައިލެންޑު އޭވިއޭޝަނުގެ މަތިންދާ ބޯޓެކެވެ. މިހާތަނަށް ކަނޑާއި ވައިގެ މަގުން ބޮޑު ސަރަހައްދެއް ބަލާފައިވާ ކަމަށް ވެސް އެމްއެންޑީއެފުން މައުލޫމާތުދެއެވެ. ނަމަވެސް މި ދޯނި ހޯދުމަށް ޑްރޯން ބޭނުން ނުކުރަނީ ކީއްވެތޯ ތަކުރާރުކޮށް ނޫސްވެރިން ސުވާލުކުރުމުންވެސް އެމްއެންޑީއެފުން ޖަވާބެއް ނުދެއެވެ. އެމްއެންޑިއެފް ގެ މީޑިއާ އޮފިޝަލުވެސް މި ސުވާލު ތަކަށް ޖަވާބުދޭން ވަނީ އިންކާރުކޮށްފައެވެ.
އައިލެންޑު އޭވިއޭޝަނުގެ މަތިންދާ ބޯޓު ތަކަށްވުރެ އިންޑިއާއިން ހަދިޔާކޮށްފައިވާ ޑޯނިއާ މަތިންދާ ބޯޓުވެސް ރެސްކިއު އޮޕަރޭޝަންތަކަށް މާބޮޑަށް ރަނގަޅުވާނެ ކަމަށް ކަމާބެހޭ މާހިރުން ވިދާޅުވެއެވެ. ނަމަވެސް އެ އުޅަނދުވެސް މި ދޯންޏާއި ފަޅުވެރިން ހޯދުމަށް ބޭނުން ނުކުރެއެވެ. މި ކަމުގެ ސަބަބުން ގިނަ ބަޔަކު ސަރުކާރަށް ފާޑުކިޔަމުން އަންނައިރު ކަމާ ބެހޭ އިދާރާތަކުންވެސް ވަކި ޖަވާބެއް ނުދެއެވެ.
