މޯލްޑިވްސް އިސްލާމިކް ބޭންކުގައި ހުޅުވާފައިވާ އެކައުންޓަކުން 1.8 މިލިއަން ރުފިޔާ ވަގަށް ނެގުމުގައި އިސްރޯލެއް އަދާ ކުރީ 16 އަހަރުގެ ކާފަ ދަރިފުޅު ކަމަށް ފުލުހުން ހާމަކޮށްފިއެވެ. މި މަހުގެ 3 ވަނަ ދުވަހު ފުލުހުން ހުށައެޅި މައްސަލައިގެ މައުލޫމާތު ދެމުން ފުލުހުން ބުނީ އިސްލާމިކް ބޭންކުގައި ހުޅުވާފައިވާ އެކައުންޓަކުން ގިނަ އަދަދެއްގެ ފައިސާ ވެރި ފަރާތަށް ނޭންގި ވަގަށް ނެގި މައްސަލައެއް ހުށައެޅުމުން ވަގުތުންއެ މައްސަލައިގެ ތަހުގީގު ފެށި 48 ގަޑިއިރު ތެރޭގައި އެކައުންޓުން ގެއްލުނު %98 ފައިސާ ހޯދިފައިވާ ކަމަށެވެ.
އުމުރުން ދުވަސްވީ ވިޔަފާރިވެރިޔާގެ އެކައުންޓުން ފައިސާ ނެގުމުގައި އިސްކޮށް ހަރަކާތްތެރިވީ އޭނައަށް ކާފަ ކިޔާ 16 އަހަރުގެ ކުއްޖެކެވެ. އެ ކުއްޖާ ދިރިއުޅެނީވެސް ކާފައާއި އެކުގައެވެ.
ފައިސާ ނެގުމުގައި އަމަލުކޮށްފައިވާ ގޮތްތަކަކީ:
ފައިސާ ޓްރާންސްފަކޮށްފައިވަނީ ކާފަ ނަމާދަށް ދާ ގަޑީގައި ބެންކުގެ އެޕު ބޭނުންކޮށްގެން (ފޯނުން)
1.8 މިިލިއަން ރުފިޔާ އެކައުންޓުން ނަގާފައިވަނީ 9 ދުވަސް ތެރޭގައި
މި ފައިސާ ޓްރާންސްފަރކޮށްފައިވަނީ މި ކަމުގައި ބައިވެރިވާ އަނެއް 3 މީހުންގެ އެކައުންޓު ތަކަށް، އެމީހުން ވަނީ މި މައްސަލާގައި ހައްޔަރުކޮށްފައި
މި މައްސަލާގައި ހިމެނެނީ އުމުރުން 24 އަހަރުގެ އަންހެނަކާއި،އުމުރުން 24 އަހަރުގެ ފިރިހެނަކާއި، އުމުރުން 23 އަހަރުގެ ފިރިހެނެއް. މިމީހުންގެ ވަނަވަރު ފުލުހުން އަދި ހާމައެއް ނުކުރޭ
