މި ސަރުކާރުން މަސްވެރިންނަށް ފައިސާ ނުދޭ މައްސަލާގައި އިޖުތިހާދު ކުރަމުންދިޔަ މަސްވެރިންނާ މުހާތަބުކޮށް، ފިޝަރީޒް މިނިސްޓްރީގެ ޑިރެކްޓަރ ޖެނެރަލް ޑރ.ހުސެއިން ސިނާނު ދޮގު ހެދުމުން އާއްމުންނާއި މަސްވެރިންގެ ފާޑު ކިޔުން އަމާޒު ވެއްޖެއެވެ. މަސްވެރިންނަށް ފައިސާ ނުލިބި ވަރަށް ދަތި ހާލަތަކަށް ވެއްޓިފައިވާ ކަމަށް ބުނުމުން ސިނާނު ވިދާޅުވީ ތިމަންނާއަށްވެސް ލިބެނީ އެންމެ 7000 ރުފިޔާ ކަމަށެވެ. ފިޝަރީޒް މިނިސްޓްރީގެ ޑިރެކްޓަރ ޖެނެރަލް ކަމަށް ވިދާޅުވެ އެ ވަރު ދަށް މުސާރައެއް ބުނުމުން ބައެއް މަސްވެރިން ގަބޫލު ކުރިޔަސް އެ މައުލޫގައި ވާހަކަ ދައްކަން ބައެއް މަސްވެރިން ޝައުގުވެރިއެއް ނުވިއެވެ.
ނަމަވެސް ފަހުން އެ ވީޑިއޯ ސޯސަލް މީޑިއާގައި ދައުރުވާން ފެށުމުން މަސްވެރިންނާއި ބައެއް އާއްމުންވެސް އަންނަނީ ވަރަށް ބޮޑަށް ސިނާނަށް ފާޑުކިޔަމުންނެވެ. މަސްވެރިންގެ ޖަޒުބާތީ ވަގުތުކޮޅެއްގައި އެމީހުންނަށް މާ ގިނަ ފައިސާ ލިބޭނެ ކަމަށް ބުނެ ހުއްޖަތް ދައްކަން ތިމާއަށް ލިބޭ ވަރަށް ވުރެ ދަށްކޮށް، އަދި ސަރުކާރުގެ އެ ފެންވަރުގެ ބޭފުޅަކު ބުނުމަކީ ލަދު ހުތުރު ކަމެއްގެ ގޮތުގައި އަންނަނީ ސިފަކުރަމުންނެވެ. އަނެއްކޮޅުން މަސްވެރިންގެ ހިމާޔަތުގައި އެންމެ ބޮޑަށް ހުންނަން ޖެހޭ ސިވިލްސަރވިސްގެ ބޭފުޅަކު، ސިޔާސީ މަގާމުތަކުގައި ތިބި ފިޝަރީޒް މިނިސްޓަރާއި ޕީއެންސީގެ ސިޔާސީ އެކްޓިވިސްޓުންގެ ދިފާއުގައި މަސްވެރިންނާ ޒުވާބުކޮށް، އެމީހުންަށް މާ ގިނައިން ފައިސާލިބޭ މޭރުކަމުން ވާހަކަދެއްކުން ބަލައި ނުގަނެވޭނެއެވެ. އަނެއް ބަޔަކު އަންނަނީ ސިނާނުގެ ކުރީގެ އާދައިގެ ދިރިއުޅުމާއި މިހާރުގެ ދިރިއުޅުމުގެ ވާހަކަ ދައްކައި ބައެއް ޒާތީ މައުލޫމާތުވެސް އަންނަނީ ސޯސަލް މީޑިއާގައި ހިއްސާ ކުރަމުންނެވެ. އެމީހުން ސުވާލު ކުރަނި މިއީ ހަމަ އެންމެ 7000 ރުފިޔާ ލިބޭ މީހަކު ކުރެވޭނެ ހަރަދު ހެއްޔެވެ؟
މުރާސިލަށް މައުލޫމާތު ދެމުން ފިނޭންސް މިނިސްޓްރީގެ މުއައްޒަފެއް ވިދާޅުވީ އާއްމު ގޮތެއްގައި ޑިރެކްޓަރ ޖެނެރަލަކަށް މުސާރައާއި އެހެނިހެން ގޮތްގޮތުން ތިރީސްހާސް ރުފިޔާއަށް ވުރެ އިތުރަށް ލިބޭނެ ކަމަށެވެ. ސިވިލް ސަރވިސްގެ މުސާރައިގެ އޮނިގަނޑުގައިވާ ގޮތުން އެންމެ ބޮޑު މުސާރައެއް ލިބޭ އެއް ބަޔަކީ ޑިރެކްޓަރ ޖެނެރަލުންނެވެ. އަނެއްކޮޅުން އެލަވަންސް ތަކާއި ތައުލީމީ ސެޓްފިކެޓުތަކުގެ އަދަދަށް ބަލައި މުސާރައަށް އިތުރުވާ ބައިވެސް ބޮޑުވެއެވެ.
ރެއާއި ދުވާލު ކަނޑުމަތީގައި، ވެހޭހާ ވާރޭގައި، ގަދަ އަވީގައި ދޯންޏެއްގެ ފެންފިލާގަނޑު މަތީގައި ހުރެ އާމްދަނީ ހޯދާ މަސްވެރިއަކާއި، ސަރުކާރުގެ އޮފީހެއްގެ ވެރިއެއް، ފިނިކުރި ކޮޓަރިކޮޅުގައި އިނދެ، ކޮންމެ ކަމަކަށް ސެކްޓްރީން ލައިގެން ހެނދުނު 9 ން 2 އަށް ކުރާ މަސައްކަތުން ލިބޭ އެއްޗެއް އަޅާކިޔަން ހެޔޮވާނެ ހެއްޔެވެ؟ އާއްމު ރައްޔިތަކު ސުވާލުކޮށްފައިވެއެވެ.
