ޑރ. އަބްދުއްސަމަދު މެމޯރިއަލް ހޮސްޕިޓަލުގައި ފަރުވާދެމުން ދަނިކޮށް މިއަދު ހެނދުނު ނިޔާވެފައިވާ 93 އަހަރުގެ މީހަކީ ވޭތުވެދިޔަ 10 އަހަރު އެނދުމަތިކޮށްގެން ފަރުވާ ދެމުންދިޔަ މީހެއް ކަމަށް ހެލްތު ޕްރޮޓެކްޝަން އޮތޯރިޓީން ހާމަކޮށްފިއެވެ. އެ މީހާ އަކީ އުމުރުން 93 އަހަރުގެ ގދ. ގައްދޫއަށް ނިސްބަތްވާ ފިރިހެނެކެވެ. ވޭތުވެދިޔަ ދުވަސްތަކުގައި އެމީހާ އަކީ އެކި ބަލިތަކަށް ދިގު މުއްދަތަކަށް ބޭސްކުރަމުންވެސް ދިޔަ މީހެކެވެ.
މިމަހުގެ 17 ގައި މިމީހާއަށް ވަނީ ކޮވިޑް19 ގެ ވެކްސިން ދީފައެވެ.
ކޮވިޑް19 ވެކްސިން ޖެހި މީހަކު ނިޔާވެއްޖެ ކަމަށް ބައެއް ހަބަރު ފަތުރާ ވަސީލަތްތަކުން ހާމަކުރުމުން އާއްމުންގެ ތެރޭގައި ވަނީ ކޮންމެވެސް ވަރެއްގެ ކަންބޮޑުވުމެއް އުފެދިފައެވެ. ނަމަވެސް މިއަދު މި ހާމަކުރި މައުލޫމާތުން މި ބަލި މީހާގެ ހާލަތު ވަނީ ކޮންމެވެސް ވަރަކަށް ވަނީ އެނގިފައެވެ. މި މަރާ ގުޅިގެން ބަލަން ޖެހޭ ކަންކަން، ކަނޑައެޅިފައިވާ އުސޫލުތަކާ އެއްގޮތަށް ބެލުމަށްފަހު އިތުރު މައުލޫމާތު ހިއްސާ ކުރެވޭނެ ވާހަކަވެސް އެޗްޕީއޭގެ ބަޔާނުގައި ހާމަކޮށްފައިވެއެވެ.
ކޮވިޑް19 ވެކްސިން ޖެހުމަށް ފަހު، ހަށިގަނޑަށް އެއްވެސް ނޭދެވޭ އަސަރެއް ކުރޭތޯ ބެލުމަށް 15 އާއި 30 މިނެޓް ދެމެދުގެ ވަގުތުކޮޅަކަށް ކޮންމެ މީހަކު ވެކްސިން ޖަހާ މަރުކަޒުގައި ނުވަތަ ގޭގައި މޮނިޓަރ ކުރެއެވެ. އަދި އެއަށް ފަހު ވެސް އެއްވެސް ވަރަކަށް ކަންބޮޑުވާ ފަދަ އަލާމާތެއް ފެނިއްޖެ ނަމަ އަމަލު ކުރާނެ ގޮތުގެ އިރުޝާދުވެސް ދެއެވެ.
