ޑިޕާޓުމަންޓު އޮފް ޖުޑީޝަލް އެޑްމިނިސްޓްރޭޝަނުން، އިންތިޚާބުތަކަށް ކުރިމަތިލުމަށްޓަކައި ޝަރުޢީދާއިރާއިން ކުށާއިދަރަނީގެ ރެކޯޑު ސާފުކުރަން ބޭނުންވާ ފަރާތްތަކުން ރެކޯޑު ސާފުކުރުމަށް އެދި ފޯމު ހުށަހެޅުމަށް ޚާއްޞަ އީމެއިލް އެޑްރެހެއް ހަމަޖައްސައިފިއެވެ. އެ އިދާރާއިން ބުނެފައިވަނީ އެ އީމެއިލް އެޑްރެހަށް އިންތިޚާބަށް ކުރިމަތިލުމަށް ރެކޯޑު ސާފުކުރާ ފަރާތްތަކުން ފުރިހަމަ މަޢުލޫމާތާއެކު records.elections@dja.gov.mv އަށް އީމެއިލް ފޮނުވުމަށެވެ. އީ-މެއިލް މެދުވެރިކޮށް ލިބޭ ފޯމުތަކުގެ ރެކޯޑު ސާފުކުރުމަށްފަހު އީ-މެއިލް މެދުވެރިކޮށް ޖަވާބު ފޮނުވުމަށް ހަމަޖެހިފައިވާ ކަމުގައި ވެސް އެ ފަރާތުން ބުނެފައިވެއެވެ.
ޖުޑީޝަލް އެޑްމިނިސްޓްރޭޝަނުން އިލްތިމާސް ކުަރަނީ ރާއްޖޭގެ ހުރިހާ ކޯޓަކުން ރެކޯޑު ސާފުކޮށް ނިންމުމަށް 5 ދުވަހުގެ މުއްދަތެއް ނަގާތީ، އިންތިޚާބުތަކަށް ކުރިމަތިލާ ފަރާތްތަކުން ރެކޯޑު ސާފުކުރަން ހުށަހަޅާއިރު އެކަށީގެންވާ މުއްދަތު އޮއްވައި ހުށައެޅުމަށެވެ.
ކުރިއަށް އޮތް ރައްޔިތުންގެ މަޖުލީހުގެ އިންތިހާބަށް ގިނަ އަދަދެއްގެ ކެންޑިޑޭޓުން ކުރިމަތިލާއިރު ރެކޯޑު ސާފުކުރުމަށް ފަހު ނޫނީ ކުރިމަތި ނުލެވޭނެއެވެ. ޕާޓީތަކުގެ ޕްރައިމަރީގައި ވާދަކުރާ ކެންޑިޑޭޓުންގެ ރެކޯޑު ސާފުކުރުމަށްފަހު ހުށައެޅުމަށް އެ ފަރާތްތަކުންވެސް އެދެއެވެ.
