ޑެޕިއުޓީ ކޮމިޝަނަރ އޮފް ކަސްޓަމްސް ގެ މަގާމަށް ފާތުމަތު ދިޔާނާ (ސަނދުރަ، ޅ.ހިންނަވަރު) އައްޔަންކޮށްފިއެވެ.
މިއީ ކަސްޓަމްސްގެ 133 އަހަރުވީ ދިގު މާޒީގައި ފުރަތަމަ ފަހަރަށް އަންހެން ބޭފުޅެއް މި މަގާމަށް އައްޔަންކުރި ފުރަތަމަ ފަހަރެވެ.
ރައީސް ޑރ. މުހައްމަދު މުއިއްޒު، ފާތުތަމަތު ދިޔާނާ ކަސްޓަމްސް ގެ ޑެޕިއުޓީ ކޮމިޝަނަރުގެ މަގާމަށް އައްޔަން ކުރެއްވީ، މިދިޔަ ބުރާސްފަތި ދުވަހުއެވެ. ކަސްޓަމްސް ބިލްޑިންގައި މިއަދު ބޭއްވި ރަސްމިއްޔާތެއްގައި ދިޔާނާއަށް މަގާމުގެ ލިޔުމާއި ފޮތިކޮޅު ހަވާލުކޮށްދެއްވީ ކޮމިޝަނާ ޖެނެރަލް އޮފް ކަސްޓަމްސް ޔޫސުފް މާނިއު މުހައްމަދެވެ.
ކަސްޓަމްސް އިން ދިޔާނާއަށް މަރުހަބާ ކިޔައި ނެރެފައިފައިވާ ބަޔާނުގައި ބުނެފައިވަނީ މިއީ ތަންފީޒީ އިދާރާތަކުގެ ހިންގުމުގައި ފުރަތަމަ ފަހަރަށް އަންހެން ބޭފުޅަކު އައްޔަނުކުރެވުނު ފަހަރަށްވުމާއެކު، މިއީ ކަސްޓަމްސްގެ އިތުރުން ތަންފީޒީ އެހެން އިދާރާތަކުގެ ހިންގުމުގައި ވެސް ފިރިހެނުންނާއި އަންހެނުން ތަފާތުކުރުމެއްނެތި ޝާމިލުކުރުމަށް ތަނަވަސްވި ފުރުސަތެެއް ކަމަށެވެ.
ދިޔާނާ ވަނީ ކަސްޓަމްސްގެ ޚިދްމަތުގައި 23 އަހަރު ފުރިހަމަކުރައްވާފައެވެ. ޑެޕިއުޓީ ކޮމިޝަނާ އޮފް ކަސްޓަމްސްގެ މަޤާމަށް އައްޔަނުކުރެއްވުމުގެ ކުރިން އޭނާ ހުންނެވީ ޑެޕިއުޓީ ޗީފް ސުޕްރިންޓެންޑެންޓްގެ މަޤާމުގައެވެ. ދިޔާނާ ވަނީ ކަސްޓްމަސްގައި 23 އަހަރަށްވުރެ ގިނަ ދުވަހު ހިދުމަތްކުރައްވާފައެވެ.
