މަސްވެރިންނަށް ފައިސާ ނުދެވީވެ، ކޫއްޑޫގެ މަސްގަތުމުގެ އޮޕަރޭޝަންތައް ވަގުތީ ގޮތުން ހުއްޓާލައިފިއެވެ. މިއަދު ހެނދުނުން ފެށިގެން ކޫއްޑޫގައި މަސްވެރިން ކުރަމުންއަންނަ އިޖުތީހާދުގައި، މަސްވެރިން ބުނަމުން ދަނީ އެމީހުންނަށް ލިބެންވާ ފައިސާ ވަގުތުން ދިނުމަށެވެ. މަސްވެރިން ކޫއްޑޫއާއި މިފްކޯގެ މަސްކިރާ ކާރުހާނާތަކަށް ވިއްކާފައިވާ ބިލުތަކަށް ފައިސާ ނުލިބޭތާ 3 މަސް ވެގެންދިޔައިރު ފިޝަރީޒް މިނިސްޓަރ އަހުމަދު ޝިޔާމު ވިދާޅުވެފައިވަނީ މާރޗު 5 ގެ ކުރިން ހުރިހާ ބިލަކަށް ފައިސާދައްކާ ހަލާސްކުރާނެ ކަމަށެވެ.
ކޫއްޑޫގައި ތިބި މަސްވެރިން ބުނަމުންދަނީ އެމީހުންނަށް ލިބެންވާ ފައިސާ ނުދެނީސް ކޫއްޑޫގެ އޮޕަރޭޝަންތައް ފަށައިގެން ނުވާނެ ކަމަށެެވެ. މި ސަރުކާރު ހަވާލުވެ ކޫއްޑޫއަށް މެނޭޖަރުންގެ ފެންވަރުގައި 10 މީހަކަށް އަލަށް ވަޒީފާއި ދީފައިވާ ކަމަށާއި ކޫއްޑޫއަށް އެކަނި ބެލިޔަސް އިސްރާފުކުރުން އިންތިހާއަށް އޮތްއިރު ހަރަދު ކުޑަކުރުމުގެ ގޮތުން މަސް ގަންނަ އަގު ދަށްކޮށް އަދި ގަވައިދުން ފައިސާ ނުލިބުމަކީ ގަބޫލު ކުރެވޭ ކަމެއް ނޫން ކަމަށްވެސް މަސްވެރިން ބުނެއެވެ.
މަސްވެރިންގެ ޝަކުވާ އަޑުއަހައި އިތުރަށް މަޝްވަރާ ކުރުމަށް ފިޝަރީޒް މިނިސްޓަރުވެސް މިއަދު ކޫއްޑޫއަށް ދިއުމަށް ވަނީ ހަމަޖެހިފައެވެ.
