މަސްވެރިންނަށް ނުދެވިފައިވަނީ 300 މިލިއަނެއްހާ ރުފިޔާ ކަމަށާއި އެ ފައިސާ އަންނަ މާރޗު މަހުގެ 5 ވަނަ ދުވަހުގެ ކުރިން ނިންމާ ހަލާސްކުރާނެ ކަމަށް ފިޝަރީޒް މިނިސްޓަރ އަހުމަދު ޝިޔާމު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ކޫއްޑޫގައި މަސްވެރިން ކުރަމުންދާ އިޖުތިހާދަށް ޖަވާބު ދިނުމުގެ ގޮތުން އެކްސްގައި ކުރެއްވި މެސެޖެއްގައެވެ. މަސްކިރުވާފައި ފައިސާ ނުލިބޭ މައްސަލާގައި މަސްވެރިން އަންނަނީ ކޫއްޑޫގައި މުޒާހަރާ ކުރަމުންނެވެ. ބައެއް ދޯނި ފަހަރުގެ ވެރިން ބުނަމުންދަނީ ކޫއްޑޫއިން ދާނީ އެމީހުންނަށް ލިބެންވާ ފައިސާ އެކީގައި ލިބުމުން ކަމަށެވެ. މީގެ އިތުރުން މިނިސްޓަރު ވިދާޅުވީ މަސްވެރިންގެ ކަންބޮޑުވުން އަޑުއެހުމަށްޓަކައި ކޫއްޑޫއަށް މިހާރު ދަތުރުކުރަމުންދާ ކަމަށާއި ކުރިއަށް އޮތް ދުވަސްތަކުގައި ކޮންމެ ހަފްތާއަކުން ބަރާބަރަށް މަސްވެރިންނަށް ފައިސާ ލިބޭނެ ގޮތް ހަމަޖައްސައިދެއްވާނެ ކަމަށެވެ.
ކޫއްޑޫގައި މި ވަގުތު މަސްވެރިން އިޖުތިހާދު ކުރަމުންދާތީ މިނިސްޓަރު އިލްތިމާސް ކުރެއްވީ އެކަން ހުއްޓާލުމަށް ފަހު ކޫއްޑޫ އޮޕަރޭޝަނަށް ގެންދެވޭނެ ފަދަ ގޮތަކަށް މަސްވެރިން އަމަލުކޮށްދިނުމަށެވެ.
