މިފްކޯއިން މަސްވެރިންނަށް ފައިސާ ނުދޭ މައްސަލާގައި، މަސްވެރިން އިޖުތިހާދު ކުރަން ފަށައިފިއެވެ. ކޫއްޑޫއަށް މަސްކިރުވުމަށް ފަހު މިއަދުވެސް އެއްވެސް ބިލަކަށް ފައިސާ ނުދިނުމުން މަސްވެރިން އަންނަނީ ކޫއްޑޫ އޮފީސް ތެރޭގައި ހިތްހަމަ ނުޖެހުން ފާޅުކޮށް އެމީހުންނަށް ދޭން ޖެހޭ ގިނަ އަދަދެއްގެ ފައިސާ ދިނުމަށް ގޮވާލާ މުޒާހަރާ ކުރަން ފަށާފައެވެ. ބައެއް މަސްދޯނި ތަކަށް 7 މިލިއަން، އަދި އަނެއް ބައި ދޯނި ފަހަރަށް 2 މިލިއަނުން ސަރުކާރުން ފައިސާ ދޭން ޖެހިފައިވާއިރު އެމީހުންގެ ކަންބޮޑުވުމަކީ ދާދި ފަހުން މަސްގަންނަ އަގު ދައްކުރުމެވެ.
ކޫއްޑޫގައި ހިމްހަމަ ނުޖެހިފައިހުރި މަސްވެރިއަކު މުރާސިލަށް ވާހަކަދައްކަމުން ބުނީ އިގްތިސާދީ ގޮތުން ހަރަދު ކުޑަކުރުމަށް މަހުގެ އަގު ދަށްކޮށް އަދި މަސްވެރިންނަށް ދޭނެ ފައިސާ ނެތް ކަމަށް ބުނާއިރު އެ މަންޒަރު ސަރުކާރުގެ އަމަލުން ނުފެންނަ ކަމަށެވެ. މި ގޮތުން ސިޔާސީ މަމާގުގެ ގޮތުގައިވެސް ގިނަ އަދަދެއްގެ ޑެޕިއުޓީ މިނިސްޓަރުން އައްޔަންކޮށްފައިވާ އިރު، މި ފަހުން ދުބާއީއަށްވެސް 100 މީހުންގެ ވަފުދެއް ދިއުން ފަދަ ބޮޑެތި އިސްރާފުތަކެއް ކުރަމުންދާއިރު މަސްވެރިންނަށް އެއްޗެއް ދޭންވީމާ ސަރުކާރުން ފައިސާ ނެތް ކަމަށް ބނެ ލަސް ކުރުމަކީ ބަލައިގަނެވޭނެ ކަމެއް ނޫން ކަމަށެވެ.
ކޫއްޑޫ ހިމެނޭ ސަރަހައްދަކީ ގިނަ އަދަދެއްގެ ހުވަދޫ މަސްވެރިން މަސް ކިރުވާ ތަނެއް ކަމަށްވުމުން، މަސްވެރިންގެ ކަންބޮޑުވުންތައް ހިއްސާކުރައްވަމުން ގއ.ވިލިނގިލީ ދާއިރާގެ މަޖުލިސް މެމްބަރު ސައުދު ހުސެއިން ވިދާޅުވީ ސަރުކާރުން މަސްވެރިންނަށް ދޭން ޖެހޭ ފައިސާ ނުދިނުމުގެ ސަބަބުން މަސްވެރި އާއިލާ ތަކަށް ވަނީ ވަރަށް ބޮޑެތި ދަތިތަކާއި ކުރިމަތިލާން ޖެހިފައެވެ. މީގެ ތެރޭގައި އެންމެ އަސާސީ ކަންކަމަށްވެސް ހަރަދުކުރާނެ ފައިސާ އެމީހުން އަތުގައި ނެތް ކަމަށާއި ސަރުކާރުން މަސްވެރިންނަށް ވަމުންދާ އިހުމާލު ވަގުތުން ހުއްޓާލުމަށާއި މަސްވެރިންނަށް ދޭން ޖެހޭ ހައްގު ފައިސާ ވަގުތުން ދިނުމަށް ސައުދު ގޮވާލެއްވިއެވެ.
މަސްވެރިން އިޖުތިހާދު ހުއްޓުވުމަށް ކޫއްޑޫގައި މިހާރު އަންނަނީ ޕޮލިހުން ހަރަކާތްތެރިވަމުންނެވެ. މި މައްސަލާގައި ފިޝަރީޒް މިނިސްޓްރީ އަދި މިފްކޯއިން މިހާތަނަށް ވާހަކައެއް ނުދައްކައެވެ.
