ދިވެހި ރާއްޖޭގެ ރައީސުލްޖުމްހޫރިއްޔާ ކަމުގެ ހުވާ ޑރ. މުހައްމަދު މުއިއްޒު ކުރައްވައިފިއެވެ.
ޖުމްހޫރީ މައިދާނުގެ އެކަމަށްޓަކައި މިއަދު ހަވީރު ބޭއްވި ރަސްމިއްޔާތެއްގައި ޑރ. މުއިއްޒު އަދި އެމަނިކުފާނުގެ ނައިބްރައީސް ކަމުގެ މަގާމަށް ހުސެން މުހައްމަދު ލަތީފުވެސް ވަނީ ހުވާ ކުރައްވާފައެވެ. ރައްޔިތުންގެ މަޖުލީހުގެ ޖަލްސާއެއްގެ ގޮތުގައި ކުރިއަށްދިޔަ މި ރަސްމިއްޔާތުގައި ދެ ބޭފުޅުންނަށްވެސް ހުވާ ލައި ދެއްވީ ދިވެހިރާއްޖޭ އުއްތަމަ ފަނޑިޔާރު އަލްއުސްތާޒު މުއުތަސިމު އަދުނާނެވެ.
ރާއްޖޭގެ އަށްވަނަ ރައީސް މުއިއްޒު ހުވާ ކުރެއްވުމުގެ ރައްޔިތުންގެ މަޖިލީހުގެ ޖަލްސާގެ ރިޔާސަތު ބެލެހެއްޓެވީ މަޖިލީހުގެ މިހާރުގެ ރައީސް މުހައްމަދު އަސްލަމްއެވެ.
ހުވާ ކުރެއްވުމުގެ ރަސްމިއްޔާތުގައި ކުރީގެ ރައީސް އިބްރާހީމް މުހައްމަދު ސޯލިހު އަދި ކުރީގެ ނައިބު ރައީސް ފައިސަލް ނަސީމް ބައިވެރިވެވަޑައިގެންނެވިއެވެ. އަދި އެ ސަރުކާރުގެ ވަޒީރުންނާއި އެމްޑީޕީގެ ޕާލިމެންޓްރީ ގްރޫޕުގެ މެމްބަރުންގެ އިތުރުން ރައްޔިތުން މަޖިލީހުގެ ކުރީގެ ރައީސް މުހައްމަދު ނަޝީދު އަދި ޕީޕީއެމް/ޕީއެންސީގެ ޕާލިމެންޓްރީ ގްރޫޕުގެ މެމްބަރުންނާއި އެ ކޯލިޝަންގެ އިސްވެރިން ބައިވެރިވެވަޑައިގެންނެވިއެވެ.
މީގެ އިތުރުން ސްރީލަންކާގެ ރައީސް ރަނިލް ވިކްރަމަސިންހަ އާއި އަދި ބޭރުގެ 46 ގައުމަކުން 120 އަށްވުރެ ގިނަ މަންދޫބުން ބައިވެރިވިއެވެ. މި ރަސްމިއްޔާތުގައި ޕީޕީއެމް ގެ ރައީސް އަބްދުﷲ ޔާމީން ބައިވެރިވެ ވަޑައި ނުގަންނަވައެވެ.
