ހދ. ނޮޅިވަރަމް ފުޓްސަލް ދަނޑުގައި އަނެއްކާވެސް ރޯކޮށްލައިފިއެވެ. މިއި މި ދަނޑުގައި އަލިފާން ރޯކޮށްލި ތިން ވަނަ ފަހަރެވެ.
މީގެ ކުރިން ރޯކޮށްލާފައިވަނީ މި ދަނޑު ހަދަން ގެނައި ސާމާނުތަކުގައެވެ. އޭގެ ފަހުން ވަކި ވަރަކަށް ހަދާފައި ހުއްޓާ މިދިޔަ އަހަރު ތެރޭގައިވެސް ވަނީ ރޯކޮށްލާފައެވެ.
އެ ރަށުު ފުޓްސަލް ދަނޑުގައި ރޭ ރޯކޮށްލާފައިވަނީ ފުޓްސަލް މުބާރާތެއް ބާއްވަން ތައްޔާރުވަމުން އަންނަނިކޮށެވެ. އެ ރަށުން ވާހަކަ ދެއްކި މީހަކު ބުނީ ކޮންމެ ފަހަރަކުވެސް ރޯކޮށްލަނީ ބަޔަކު ގަސްތުގައި ކަމަށެވެ.
އެގޮތުން، އެ ސަރަހައްދުން އަލިފާން ރޯކުރަން ބޭނުންކުރާ އާލާތްތައް ވެސް ވަނީ ފެނިފައެވެ.
މި ހާދިސާއާ ގުޅިގެން ފުލުހުން މިއަދު ބުނީ، ނޮޅިވަރަމް ފުޓްސަލް ދަނޑުގައި ރޯވިކަމުގެ މައުލޫމާތު ރޭ ވަގުތެއްގައި ލިބިފައިވާ ކަމަށެވެ.
ފުލުހުން އަންނަނީ މި މައްސަލަ ތަހުގީގު ކުރަމުންނެވެ. އެހެންވެ، މައްސަލައާ ގުޅޭ ގޮތުން އިތުރު އެއްވެސް ތަފުސީލެއް ފުލުހުން ނުދެއެވެ. އަދި، ރޯވީ ކަމެއް ނުވަތަ ރޯކޮށްލީ ކަމެއް ވެސް ބުނަން އެނގޭނީ ތަހުގީގު ނިމުމުން ކަމަށް ފުލުހުން ބުންޏެވެ.
މި ދުވަސްކޮޅަކީ އީދުގެ ފޯރި މުޅި ރާއްޖޭގައި ފާހަގަކުރަމުންދާ ދުވަސްކޮޅެއްވިޔަސް ނޮޅިވަރަންފަރުގެ ރައްޔިތުން ތިބީ އެރަށުގައި ކޮންމެ ފަހަރަކު މި ކަން ކުރާ މީހުން ހޯދައި އަދަބު ނުދެނީސް އެއްވެސް ކަހަލަ ކުޅިވަރެއްގައި ބައިވެރިވާ ގޮތަކަށް ނޫނެވެ. އެ ރަށު ބައެއް މީހުން ސޯސަލް މީޑިއާގައި ޝުއޫރު ފާޅު ކުރަމުން ބުނެފައިވަނީ ވެރިކަންކުރާ ޕާޓީ ޕީއެންސީގެ ވަރަށް ބޮޑު އަގުލަބިއްޔަތެއް އޮންނަ އެ ރަށުގައި ކުށެއް ކުރިޔަސް އެކަން ކުރި ބަޔަކު ނުބެލެނީ ކޮންމެވެސް ސިޔާސީ ނުފޫޒަކުން އެކަން ކުރާ މީހުން ސަލާމަތްކޮށްދޭތީއެވެ. މީގެ ކުރިން ހިނގި މި ފަދަ ހާދިސާތަކުގައި އެއްވެސް މީހަކު ހައްޔަރުކޮށް، ފިޔަވަޅު އަޅާފައި ނުވެއެވެ.
