ނޫމަޑި މައްސަލައިގައި ކުރީގެ ހައުސިން މިނިސްޓަރ އަދި މާލެ ސިޓީގެ މޭޔަރ ޑރ. މުއިއްޒުގެ މައްޗަށް ދޮގު ބަޔާން ދިންކަމަށް ތުހުމަތުކޮށް ދައުލަތުން އުފުލާފައިވާ ދައުވާގެ ޝަރީއަތުގެ އަޑުއެހުތައް ނިމި، ހުކުމާ ހިސާބަށް ހިނގައްޖެއެވެ.
ދައުލަތުން މުއިއްޒުގެ މައްޗަށް ދޮގުބަޔާން ދިނުމުގެ ކުށުގެ ދައުވާ އުފުލާފައިވަނީ 2019 ވަނަ އަހަރު ޖޫން މަހުގެ 25 ވަނަ ދުވަހުއެވެ.
އޭރު ޕީޖީން ބުނީ މުއިއްޒުގެ މައްޗަށް ދައުވާ އުފުލީ، ނޫމަޑި ރިސޯޓްސް އެންޑް ރެޒިޑެންޝަން އޭޖީ ނަމަކަށް ކިޔާ ކުންފުންޏަކުން (ނޫމަޑި) ދިވެހި ސަރުކާރާ ދެކޮޅަށް ނެދަލޭންޑްސްގެ ދަހޭގްގައި ހުންނަ ޕާމަނަންޓް ކޯޓް އޮފް އާބިޓްރޭޝަންއަށް ހުށަހަޅާފައިވާ މައްސަލާގައި އެކުންފުނީގެ ހެކިވެރިއަކަށްވެ، ހައުސިންގ ޔުނިޓް މަޝްރޫއާ ގުޅިގެން ނޫމަޑިއާއެކު ދިވެހި ސަރުކާރުން 2011ވަނަ އަހަރު ވެފައިވާ ފޭސް 1ގެ އެއްބަސްވުމާއި 2013ގައި ވެފައިވާ ފޭސް 2ގެ އެއްބަސްވުމުގެ މަސައްކަތް އެކުންފުނިން ޝެޑިއުލްއާ އެއްގޮތަށް ލަސްތަކެއްނުވެ ކުރަމުން ގެންދިޔަކަމަށް ބުނެ، އަދި ނޫމަޑިއަށް ލަގްޒަރީ ވިލާ އެޅުމަށް ދިވެހި ސަރުކާރުން ދޫކޮށްފައިވާ ޅ. ދިއްފުށިމާދޫ، ސަރުކާރުގެ ބޭނުމަށް ނެގުމުގެ މަޝްވަރާގައި ބައިވެރިވެފައިނުވާކަމަށް ބުނެ، ދޮގު ބާޔަނެއް ދީފައިވާތީ ކަމަށެވެ.
މި މައްސަލައިގައި މިއަދު ކްރިމިނަލް ކޯޓުގައި އޮތީ ހުލާސާ ބަޔާން އިއްވުމެވެ. އެ ބަޔާން އިއްވަމުން ދައުލަތުން މުއިއްޒުގެ މައްޗަށް އެ މައްސަލަ ސާބިތުކުރެވޭ މިންވަރަށް ހެކި އެބަހުރި ކަމަށް ބުނެފައިވީ ނަމަވެސް، ދިފާއުން ވަނީ އެކަމަށް އިންކާރުކޮށް މުއިއްޒުގެ މައްޗަށް އެ މައްސަލަ ސާބިތުވާނެ ވަރުގެ ހެއްކެއް ދައުލަތަށް ދެއްކިފައި ނުވާކަމަށް ބުނެފައެވެ.
މި މައްސަލައިގެ އަޑުއެހުންތައް ނިމި، ހުކުމާ ހިސާބައް ގޮސްފައިވާއިރު، މި މައްސަލަ ބެއްލެވި ގާޒީ ސޮފްވަތު ހަބީބް ވިދާޅުވީ މައްސަލަ ނިންމުމަށް ބާއްވާ އަޑުއެހުން ބަންދު ދުވަސްތައް އުނިކުރުމަށްފަހު 15 ދުވަސް ތެރޭގައި ތާވަލު ކުރާނެ ކަމަށެވެ.
ނޫމަޑިއާއެކު އެއްބަސްވެފައިވަނީ އެކި ރަށްތަކުގައި 1100 ހައުސިން ޔުނިޓް އެޅުމަށެވެ. މި އެއްބަސްވުން އެއްވެސް ސަބަބެއްނެތި ކުރީގެ ސަރުކާރުން އުވާލުމާއި ގުޅިގެން އެއްބަސްވުން ބާޠިލްކުރި މައްސަލަ ސިންގަޕޫރުގެ އާބިޓްރޭޝަނަށް 2017 ވަނަ އަހަރުވަނީ ހުށަހަޅާފައެވެ. ނެދަލޭންޑްސްގެ ދަ ހޭގްގައި ހުންނަ ޕާމަނަންޓް ކޯޓް އޮފް އާބިޓްރޭޝަނަށް ނޫމަޑިން ހުށަހެޅީ 2.3 ބިލިއަން ރުފިޔާ އާއި އާބިޓްރޭޝަނާގުޅޭ އެހެން ހަރަދުތައް ހޯދުމަށެވެ.
އެކި ރަށްތަކުގައި 1100 ހައުސިން ޔުނިޓް އެޅުމަށް ނޫމަޑިއާއެކު ހެދި އެއްބަސްވުން، ކުރީގެ ރައީސް އަބްދުﷲ ޔާމީންގެ ސަރުކާރުގައި ބާޠިލްކުރި މައްސަލާގައި ބަދަލުގެ ގޮތުގައި އެކުންފުންޏަށް 155 މިލިއަން ޑޮލަރު ހޯދަން ނޫމަޑިން އާބިޓްރޭޝަނަށް ހުށަހެޅުމުން ސަރުކާރުން ވަނީ އާބިޓްރޭޝަނުން ބޭރުގައި މަޝްވަރާކޮށް، ބަދަލުގެ ގޮތުގައި 55 މިލިއަން ޑޮލަރު ނޫމަޑިއަށް ދީފައެވެ.
ނޫމަޑިއަށް މައްސަލަ ކާމިޔާބުވާ ގޮތަށް މުއިއްޒު ބާޔާން ދިނީ ރިޝްވަތު ނަގައިގެން ކަމަށާއި މި ސަރުކާރުން ބޮޑު ބަދަލެއް ދީ ގެއްލުން ކުރަން ކަމަށް ބައެއް މީޑިއާތަކުގައި މީގެ ކުރިން ރިޕޯޓްކޮށްފައި ވިޔަސް މި ހުރިހާ ތުހުމަތެއް މުއިއްޒު ދޮގުކުރެއެވެ.
