މީހަކު ރަހީނުކޮށް، އޭނާގެ އޮރިޔާންކާޑު ހެދި މައްސަލާގައި ބަޔަކު ހައްޔަރުކޮށްފި

މީހަކު ރަހީނުކޮށް ގަދަކަމުން އޭނާގެ އޮރިޔާން ކާޑު ހެދިކަމުގެ ތުހުމަތުގައި ތިން މީހަކު ހައްޔަރުކޮށްފިއެވެ.

މޯލްޑިވްސް ޕޮލިސް ސަރވިސްއިން މީޑިއާތަކަށް ފޮނުވި މެސެޖެއްގައި ބުނީ، އެ ތިން މީހުން ހައްޔަރުކުރީ މީހަކު ރަހީނުކޮށް މާރާމާރީ ހިންގި ކަމަށް ތުހުމަތުކުރެވޭ މައްސަލައަކާ ގުޅިގެން މި މަހުގެ 14 ވަނަ ދުވަހު ކޯޓު އަމުރެއްގެ ދަށުން ކަމަށެވެ.

އެ މައްސަލާގައި ހައްޔަރުކޮށްފައިވަނީ:

ޝަހުމީން ރަޝީދު، 25އ

މުހައްމަދު ޒަމީރު، 27އ

ހުސައިން މައޫޒް އަބްދުﷲ، 26އ.

ފުލުހުން ބުނީ، އެ މީހުންގެ ތެރެއިން ކުށުގެ ރެކޯޑު އޮތް ޝަހުމީންގެ ބަންދަން ކްރިމިނަލް ކޯޓުން 12 ދުވަސް ޖަހާފައިވާ ކަމަށާއި ލަމީރާއި މައޫޒްގެ ބަންދަށް ފަސް ދުވަސް ޖަހާފައިވާ ކަމަށެވެ.

އެ މީހުންގެ ބަންދު އަމުރުގައިވާ ގޮތުން އެ މީހުންގެ މައްޗަށް ފަސް ތުހުމަތެއްކުރެއެވެ. އެއީ ހުއްދަ ނޫން ގޮތުގައި މީހަކު ހިފެހެއްޓުމާއި ބިރުދެއްކުމާއި ފޭރުމާއި ވައްކަންކުރުމުގެ އިތުރުން އޮރިޔާން ކާޑު ހެދުމެވެ.

މި ހާދިސާ ހިނގީ ކޮން ދުވަހަކު ކަމެއް އަދި މި ކަމާ ބެހޭ އިތުރު މައުލޫމާތެއް ފުލުހުން ނުދެއެވެ.