އއ. ރަސްދޫ ރައްޔިތުންގެ އެންމެ ބޮޑު ކަންބޮޑުވުމަކީ ރަށް ފުރި އިތުރަަށް ގޯތި ދޭނެ ޖާގަވެސް ނެތުމެވެ. ލޯކަލް ޓުއަރިޒަމް ވަރަށް ބޮޑަށް ކުރިއަރާފައިވާ އެ ރަށުގައި ފަޅު ހިއްކައިގެންވެސް އެ ވަރަށް ބިން ދެވޭކަށް ނެތެވެ.
އއ. އަތޮޅުގެ ރަށްތަކަށް ކުރައްވަމުންގެންދަވާ ރިޔާސީ ކެމްޕޭން ދަތުރުފުޅުގެ ތެރެއިން މިއަދު ހެނދުނު ރަސްދުއަށް ވަޑައިގެން ސަޕޯޓަރުންނާ ބައްދަލުކުރައްވައި ރައީސް ވަނީ އެ މަނިކުފާނުގެ ދެވަނަ ދައުރުގައި އެ ރަށަށް ކޮށްދެއްވާނެ ގިނަ ވައުދުތަކެއް ވެވަޑައިގެންފައެވެ.
އެގޮތުން ރަސްދޫ ކައިރިން ފަޅެއް ހިއްކައިދޭނެ ކަމަށް ވައުދުވަމުން ރައީސް ވިދާޅުވީ، އެކަމާ ގުޅޭ ގޮތުން ރަށު ކައުންސިލާ މަޝްވަރާ ކުރައްވާނެ ކަމަށެވެ.
މީގެ އިތުރުން ވެސް ރަސްދޫއަށް ކޮށްދެއްވާނެ ކަމަށް ވިދާޅުވި ކަންތައްތަކުގެ ތެރޭގައި އޮފީސް ކޮމްޕްލެކްސް އެއް އިމާރާތް ކުރުމާއި، ސްކޫލުގެ މަލްޓިޕާޕޯސް އިމާރާތާއި، ސްކޫލުގެ މަލްޓީ ސްކިލްޑް ކުލާސް ރޫމް ބުކޮކެއް ހެދުމާއި، ސްކޫލޫގެ ކޮމްޕިއުޓަރ ލެބާއި ލައިބްރަރީ އާއި ޕްލޭ އޭރިއާއެއް ހެދުމުގެ އިތުރުން ސުވިމިންގ ޓްރެކާއި ފުޓްބޯޅަ ދަނޑުގެ ޗޭންޖިން ރޫމާއި ސިޑީބަރިއެއް ހެދުން ހިމެނެއެވެ. އޭގެ އިތުރުން އެންމެ މުހިއްމު ވައުދަކީ އެެއަރޓެކްސީ ކައިރި ކުރެވޭ ގޮތަށް ފްލޯޓިންގ ޕްލެޓްފޯމެއްގެ ވައުދެވެ.
ކުރިން އެމްޑީޕީގެ ފޯރިއޮތް ރަސްދޫގައި މި ފަހަރު ރައްޔިތުންގެ އެންމެ ބޮޑު ކަންބޮޑުވުމަކީ މި ސަރުކާރުން އެ ރަށް ބާކީކޮށްލުމުގެ ޝަކުވާއެވެ. ސަރުކާރުން ފަށާފައިވާ ޕްރޮޖެކްޓުތައް އެކިއެކި ސަބަބުތަކާ ހެދިވެސް ލަސްވެފައިވާ ކަމުގެ ޝަކުވާއެވެ.
