ގެދޮރުވެރިޔާ ސްކީމްގެ ދަށުން ފްލެޓް ލިބޭ މީހުންގެ ލިސްޓު ބާތިލު ނުކުރުމަށް އެދި ރައްޔިތުންގެ މަޖުލީހަށް ހުށަހަޅައިފައިވާ ޕެޓިޝަނާ ގުޅޭ ގޮތުން މަޖިލީހުގެ ޕެޓިޝަން ކޮމިޓީން މިއަދު ބޭއްވި ބައްދަލުވުމަށް ހައުސިން މިނިސްޓަރު ޑރ. އަލީ ހައިދަރު ވަޑައިނުގަންނަވައެވެ. މިނިސްޓަރު ވަޑައި ނުގަތުމުން މިއަދު އޮތް ޕެޓިޝަން ކޮމެޓީގެ ބައްދަލުވުންވެސް ވަނީ ކެންސަލުކޮށްލާފައެވެ. މި ކޮމެޓީ ތަމްސީލުކުރާ ރައްޔިތުންގެ މަޖުލީހުގެ މެމްބަރަކު ވިދާޅުވީ ގޯއްޗާއި ޕްލެޓުތަކުގެ މައްސަލާގައި މި ފަހުން މިނިސްޓަރު އެއްގޮތަކަށްވެސް މައުލޫމާތު ނުދެއްވާ ކަމަށެވެ. މިއަދުގެ ބައްދަލުވުން ބޭއްވުމުންވެސް ވަކި ސަބަބެއް ބަޔާން ނުކޮށް ގަސްތުގައި ހާޒިރުނުވީ ކަމަަށްވެސް މެމްބަރު ތުހުމަތު ކުރެއްވިއެވެ. މިނިސްޓަރު ހާޒިނުވީ މަޖުލީހުގެ ގަދަރު ކުޑަކޮށްލުމަށް ކަމަވެސް ބައެއް މެމްބަރުން ވިދާޅުވިއެވެ.
ކޮމެޓީގެ ބައްދަލުވުމަށް ހާޒިރު މިނިސްޓަރު ހާޒިރުވެ ވަޑައިނުގެން މައްސަލާގައި ވެލިދޫ ދާއިރާގެ މެމްބަރު މުހައްމަދު އައްބާސް ވިދާޅުވީ ބޯހިޔާވަހި ކަމާއި ގުޅޭ ގޮތުން ހައުސިން މިނިސްޓްރީގެ ބޭފުޅުންނާ ބައްދަލުކުރުމަށް ކޮމިޓީން ނިންމީ ވަރަށް މާތް މަގުސަދެއްގައި ކަމަށެވެ.
”އަދި މިކަމަށް އެކަށީގެންވާ މުއްދަތު ވެސް ދެވިގެންދިޔައީ. ސުންގަޑި ސުންމިނިޓަށް ވީމަ ހާޒިރުވެވެން ނެތް ކަމަށް ބުނުން އެއީ ވަރަށް އިހުތިރާމުކުޑަކުރުން ކަމަށް އަޅުގަނޑު ދެކެނީ،“ އޭނާ ވިދާޅުވިއެވެ.
އައްބާސް ވިދާޅުވީ މެންބަރުން އެގޮތަށް ދެކެވަޑައިގަންނަވާކަން ހައުސިން މިނިސްޓްރީއަށް އަންގަން ޖެހޭ ކަމަށެވެ. އަދި ކޮމިޓީން އަހަން ބޭނުންވާ ސުވާލުތަކަށް މިނިސްޓްރީން ޖަވާބުދީ، ލިޔުމުން މައާފަށް އެދެން އެންގުމަށް ވެސް އޭނާ ހުށަހެޅުއްވިއެވެ.
އެމްޑީޕީގެ މަޖުލިސް މެމްބަރު ހުސެއިން ޒިޔާދު (ފިއްޓޭ) ވެސް ވަނީ މިނިސްޓަރު ވަޑައި ނުގަތުމުން ނުރުހުން ފާޅުކޮށްފައެވެ. ޒިޔާދު ވިދާޅުވީ އަބަދުވެސް އިވެނީ ރައީސް ޑރ.މުހައްމަދު މުއިއްޒު ބޯހިޔާވަހިކަމަށް ވަރަށް އަހަމިއްޔަތުކަން ދެއްވާ ވާހަކަ ކަަމަށާއި ނަމަވެސް މިނިސްޓަރުގެ ފަރާތުން އެކަން ނުފެންނަ ކަމަށެވެ. އަދި ކޮމެޓީގެ މުގައްރިރުވެސް ދައްކަވަނީ ސިޔާސީ ވާހަކަތަކެއް ކަމަށެވެ. ޒިޔާދުގެ ވާހަކަތައް ވަކި ހިސާބަކުން ކޮމެޓީގެ މުގައްރިރު މުހައްމަދު އަލީ ވަނީ ހުއްޓުވާފައެވެ.
ކޮމެޓީގެ ބައްދަލުވުން ނިންމާލީ މާދަމާ ބައްދަލުވުމެއް ބޭއްވުމުގެ ބަދަލުގައި މިނިސްޓަރަށް ރަނގަޅު ވަގުތެއް ހޯދައި، ދެން ބައްދަލުވުމެއް ބޭއްވުމަށެވެ. މި ގޮތަށް ތާއިދު ކުރެއްވީ ނައިބު މުގައްރިރު އަހުމަދު އައިފާނާއި މަޑަވެލި ދާއިރާ މެންބަރު މުހައްމަދު ޝަމީޒްއެވެ.
