ނ. މަނަދޫން ޒަޚަމްތަކަކާ އެކު މަރާލާފައި އޮއްވައި ފެނުނު ނައީމާ މޫސާގެ މަރުގެ ތަހުގީގަށް ފުލުހުން އެ ރަށުގެ ގޭގެއަށް ގޮސް ސާމްޕަލް ނަގަން ފަށައިިއެވެ. މި ގޮތުން ނަގާ ސާމްޕަލުގެ ތެރޭގައި ފިންގަރ ޕްރިންޓާއި، ނައީމާއާއި ބެހޭ ގޮތުން އެނގޭ ކަންތައްތަކުގެ ވާހަކަ ބައެއް މީހުންގެ ގޭގެއަށް ގޮސް ސުވާލުކޮށް މައުލޫމާތު ސާފުކުރުންވެސް ހިމެނެއެވެ.
ނައީމާ ޒަޚަމްތަކަކާ އެކު މަރުވެފައި އޮއްވައި ފެނުނީ މި މަހުގެ ހަތްވަނަ ދުވަހުން ފެށިގެން ޚަބަރެއް ނުވެގެން ހޯދަމުން ދަނިކޮށް އޭގެ ދެ ދުވަސް ފަހުން މިދިޔަ ހުކުރު ދުވަހުއެވެ. އޭނާގެ ޚަބަރެއް ނުވެގެން އެކަން ފުލުހުންނަށް ރިޕޯޓުކުރީ ހުކުރު ދުވަހު އިރުއޮއްސި 6:13 ހާއިރެވެ. އޭނާއަކީ ރަށުތެރެ ކުނި ކެހުމުގެ މަސައްކަތް ކުރި އެ ރަށު ކައުންސިލްގެ މުވައްޒަފެކެވެ.
ފުލުހުން ނައީމާގެ ކޮޓަރީގެ ދޮރު ހަލާކުކޮށްލައިގެން ވަންއިރު، އޭނާ އޮތީ ބިންމަތީގައި މަރުވެފައެވެ. އެނގިފައިވާ ގޮތުގައި އޭނާ މަރުވެފައި އޮތީ ގިނަ އަދި ބައެއް ބޮޑެތި ޒަޚަމްތަކަކާ އެކުއެވެ.
މި މަރަށް ގިނަ ދުވަސްތަކެއްވީއިރު އަދިވެސް މި މައްސަލައާ ގުޅިގެން މީހަކު ހައްޔަރެއް ނުކުރެއެވެ. އަދި، ތުހުމަތު ކުރެވޭ މީހެއްގެ މައުލޫމާތު ވެސް ފުލުހުން ނުދެއެވެ.
މަނަދޫއިން މައުލޫމާތު ދޭ ގޮތުގައި ނައީމާގެ ގެއަށް ގޮސް އުޅޭ މީހުންގެ ފިންގަޕްރިންޓް ފުލުހުން މިހާރު ދަނީ ނަގަމުންނެވެ. އަދި، ރަށުގެ ގޭގެއަށް ގޮސް އެ މަރާ ގުޅޭ މައުލޫމާތު އެނގޭތޯ ފުލުހުން އަންނަނީ ސުވާލު ކުރަމުންނެވެ.
ނައީމާގެ މަރާ ބެހޭ ގޮތުން މިހާތަނަށް ފުލުހުން މާބޮޑު މައުލޫމާތެއް މީޑިއާކަށް ނުދެއެެވެ. ފުލުހުން އެންމެ ފަހުން ހާމަކޮށްފައިވާ މައުލޫމާތުގައި ބުނެފައިވަނީ ޝައްކު ކުރެވޭ އެއްވެސް މީހަކުވެސް ނެތް ކަމަށާއި އަދި އެފަދަ މީހަކު ހައްޔަރުކޮށްފައިވެސް ނުވާ ކަމަށެވެ. ތަހުގީގު ކުރިއަށްދާތީވެ އިތުރު މައުލޫމާތު ފަހުން ހާމަކުރާނެ ކަމަށެވެ.
