ރައްޔިތުންގެ މަޖިލީސް އިންތިޚާބަށް ފޯމު ހުށަހެޅި 381 ކެންޑިޑޭޓުންގެ ތެރެއިން ނުވަ ކެންޑިޑޭޓުންގެ ފޯމު ޝަރުތު ހަމަނުވާތީ ބާތިލުކޮށްފައިވާ ކަމަށް އިލެކްޝަން ކޮމިޝަނުން ބުނެފިއެވެ. މީގެ އިތުރުން ދާއިރާ ތަކަށް ކުރިމަތިލާފައިވާ ކެންޑިޑޭޓުންގެ ތެރެއިން ނަން އަނބުރާ ނަގަން ހުޅުވާލި ފުރުސަތުގައި 4 ކެންޑީޑޭޓަކުވަނީ ނަން ނަގާފައެވެ.
އީސީގެ ނައިބު ރައީސް އިސްމާއީލް ހަބީބް ވިދާޅުވީ، އިންތިޚާބުގައި ވާދަ ކުރާ ކެންޑިޑޭޓުންގެ ޖުމްލަ އަދަދަކީ މިހާރު 368 ކަމަށެވެ. ޝަރުތު ހަމަނުވާތީ ބާތިލް ކުރީ ކޮން ކެންޑިޑޭޓެއްގެ ފޯމު ކަމެއް އަދި ނަން އަނބުރާ ގެންގޮސްފައި ވަނީ ކޮން ކެނޑިޑޭޓުންނެއްކަން އީސީން މިހާތަނަށް ހާމަކޮށްފައެއް ނުވެއެވެ.
ކުރިއަށް އޮތް މަޖުލިސް އިންތިޚާބަށް ކުރިމަތިލާ ޖުމުލަ 368 ކެންޑިޑޭޓުންގެ ތެރޭގައި ހިމެނެނީ 327 ފިރިހެން ކެންޑިޑޭޓުންނާއި 41 އަންހެން ކެންޑިޑޭޓުންނެވެ.
