ގަވާއިދާއި ޚިލާފަށް ރާއްޖެއިން ބޭރުކުރަން އުޅުނު ފައިސާތަކެއް މޯލްޑިވްސް ކަސްޓަމްސް ސާރވިސްއިން ހިފަހައްޓައިފިއެވެ.
އެ އިދާރާއިން ނެރުނު ނޫސްބަޔާނެއްގައިވާ ގޮތުން މި ފައިސާތައް ހިފެހެއްޓީ މިދިޔަ ހުކުރު ދުވަހު ބަންގްލަދޭޝްގެ ޑާކާއަށް ފުރުމަށް ހަމަޖެހިފައި އޮތް މޯލްޑިިވިއަންގެ ފްލައިޓަކުން ފުރުމަށް ވެލާނާ އިންޓަނޭޝަނަލް އެއަރޕޯޓަށް ގޮސް ހުރި ބަންގްލަދޭޝްއަށް ނިސްބަތްވާ 34 އަހަރުގެ ފިރިހެނެއް އަތުންނެވެ. އޭނާގެ އަތުން ތަފާތު އެކި ގައުމުތަކުގެ ފައިސާ ފެނިފައިވާ ކަމަށް ކަސްޓަމްސްއިން ބުނެއެވެ.
މިއީ ކަސްޓަމްސްއަށް ރިޕޯޓްނުކޮށް ރާއްޖެއިން ބޭރުކުރަން މަސައްކަތްކުރި ފައިސާ ކަމަށްވާއިރު މި ފައިސާތަކުގެ ޖުމްލަ ދިވެހި ރުފިޔާއިން 1،148،278.27 (އެއް މިލިއަން ސަތޭކަ ސާޅީސް އަށް ހާސް ދުއިސައްތަ ހަތްދިހަ އަށް ރުފިޔާ ހަތާވީސް ލާރި) އަށް އަރާ ކަމަށް ވެސް އެ އިދާރާއިން ވަނީ ބުނެފައެވެ.
މަނީ ލޯންޑަރިން އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނުގެ ދަށުން 10،000 އެމެރިކާ ޑޮލަރަށްވުރެ މަތީ އަދަދެއްގެ އެމެރިކާ ޑޮލަރު ނުވަތަ އެއަދަދަށްވާ ދިވެހި ރުފިޔާ ބޭރުކުރާނަމަ ކަސްޓަމްސްއަށް ޑިކްލެއަރ ކުރަންޖެހެއެވެ. މި މައްސަލަ އިތުރަށް ތަހުގީގުކުރަމުން އަންނަ ކަމަށް ކަސްޓަމްސްއިން ވަނީ ބުނެފައެވެ.
