އޮޔާދަނިކޮށް މިއަދު ސަލާމަތްކުރި ބިދޭސީ މީހާއާއި ވ.ފޮއްތެޔޮބޮޑުފުށިން މަރުވެފައިއޮތްވާ ފެނުނު ބިދޭސީ މީހާއާއި ގުޅުން ހުރި ކަމަށް މޯލްޑިވްސް ޕޮލިސް ސަރވިސްއިން ހާމަކޮށްފިއެވެ.
މީގެކުރިން ފުލުހުން މައުލޫމާތު ދީފައިވާ ގޮތުގައި ވ. ފޮއްތެޔޮ ބޮޑުފުށިން މަރުވެފައި އޮތް މީހެއްގެ ހަށިގަނޑު ފެނުނުކަމުގެ މައުލޫމާތު ލިބުނީ މިއަދު 11:02 ހާއިރު ކަމަށެވެ. އަދި އޭނާގެ ހަށިގަނޑު ފެނުނީ ދަނޑިކަނޑަށް އެ ރަށް ގޮސް އުޅުނު ބަޔަކަށް ކަމަށް ފުލުހުން ބުނެފައިވެއެވެ.
އޮޔާ ދަނިކޮށް މިއަދު ވ. އަންބަރާ ކައިރިން ސަލާމަތްކުރީ ލަންކާ މީހެއް ކަމަށް އެމްއެންޑީއެފްއިން ވަނީ މައުލޫމާތު ދީފައެވެ. އެ މީހާ ވ. ފެލިދޫ ފުލުހުންނާއި ހަވާލުކޮށްފައިވަނީ މިރޭ 19:25 ހާއިރު ކަމަށް އެމްއެންޑީއެފްއިން ބުނެއެވެ.
މި ދެ މީހުންނަކީ ގުޅުން އޮތް ދެ މީހުން ކަމަށް މިހާތަނަށް ތަހުގީގަށް ހޯދުނު މައުލޫމާތަކުން އެނގޭއިރު މި މައްސަލަ އިތުރަށް ތަހުގީގު ކުރަމުން އަންނަ ކަމަށް ފުލުހުން ހާމަކޮށްފައިވެއެވެ.
