ހެލްތު ޕްރޮޓެކްޝަން އޭޖެންސީއިން މިރޭ ނެރުނު އިއުލާނެއްގައި ވަނީ މިދިޔަ އަހަރުގެ މާޗް މަހުގެ 12 ވަނަ ދުވަހުން ފެށިގެން އާއްމު ސިއްހަތުގެ ކުއްލި ނުރައްކަލުގެ ހާލަތު ރާއްޖޭގައި އިއުލާންކޮށްފައިވާއިރު ފެބްރުއަރީ ދެވަނަ ދުވަހު 14 ދުވަހުގެ މުއްދަތަށް އަޅާފައިވާ ފިޔަވަޅުތައް އިތުރު 14 ދުވަހަށް އިތުރުކުރަން ނިންމާފައިވާ ކަމަށެވެ.
މާލެ ސަރަހައްދުގައި އަންނަނީ ކޮންމެ ރެޔަކު 11:00 އިން ފެށިގެން 04:30 އަށް ކާފިއު ހިންގަމުންނެވެ. އަދި ހަވީރު 06:00 އިން ފެށިގެން ހެނދުނު 06:00 އަށް މާލޭގައި ވެހިކަލް ދުއްވުން ވަނީ މަނާކޮށްފައެވެ. އަދި ޕާކްތަކާއި މައިޒާންތައް ބަންދުކޮށް ކުޅިވަރު ހަރަކާތްތައް ވެސް ވަނީ ހުއްޓާލާފައެވެ.
އަދި ބައެއް ގްރޭޑްތަކުގެ ކިޔެވުން އޮންލައިންކޮށް ބަދަލުކޮށް ޕްރީ ސްކޫލްތަކާއި، ނާސަރީތައް އަދި ޑޭކެއަރ ޚިދުމަތްދޭ ތަންތަން ވަނީ ބަންދުކޮށްފައެވެ. މީގެއިތުރުން ވެސް ބައެއް ފިޔަވަޅުތައް ވަނީ އަޅާފައެވެ.
ޖެނުއަރީ މަހުގެ މެދުތެރެއިން ފެށިގެން މާލޭ ސަރަހައްދުގައި ކޮވިޑް-19 ފެންނަ މިންވަރު އިތުރުވެފައިވާއިރު އަދިވެސް އަދަދުތައް 100 އިން ދަށްވެފައެއް ނުވެއެވެ.
