ލައިސެންސް ނެތި އެއްގަމު އުޅަނދު ދުއްވުމުގެ ސަބަބުން ޖުރިމަނާކޮށްފައިވާ ޒުވާނުންނަށް ރަނގަޅު ހައްލެއް ހޯއްދަވައިދެއްވާނެ ކަމަށް ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު ވިދާލުވެއްޖެއެވެ. އެމިނަކުފާނު މިހެން ވިދާޅުވީ ރައްވެހި ފަތިސް ކެމްޕެއިން ޓީމުތަކާ އޮންލައިކޮށް ބޭއްވި ބައްދަލުވުމެއްގައި ވާހަކަފުޅު ދައްކަވަމުންނެވެ.
ރައީސް ސޯލިހު ވިދާޅުވީ 18 އަހަރު ނުފުރޭ ކުދިންވެސް އެއްގަމު އުޅަނދު ދުއްވުމުގެ ސަބަބުން ޖުރިމަނާތަކެއް އަރާފައިވާ ކަމުގެ ޝަކުވާ ލިބިފައިވާ ކަމަށާއި އެކަމަށްވެސް ރަނގަޅު ހައްލެއް ހޯއްދަވާދެއްވާނެ ކަމަށެވެ. ބައެއް ކުދިން ކައިވެނިކުރަން ކޯޓަށްދާއިރުވެސް ޖުރިމަނާ ފައިސާ ނުދެއްކުމުން ކައިވެނިވެސް ނުކުރެވޭ ކަމަށާއި، ކައިވެންޏެއް ޖުރިމަނާއެއްގެ ސަބަބުން ހުއްޓުވިގެން ނުވާނެ ކަމަށްވެސް އެމަނިކުފާނު ވިދާޅުވިއެވެ.
ރައީސްގެ ވާހަކަފުޅުގައި ވަނީ ތަކުރާރުކޮށް މިފަދަ ކަންތައްތައް ހައްލުކޮށްދެއްވާނެ ކަމަށް ވިދާޅުވެފައެވެ. މީގެ އިތުރުން ލައިސަންސް ނެތި އެއްގަމު އުޅަނދު ދުއްވުމަކީ ރައްކާތެރިކަމެއް ނޫން ކަމަށާއި ހުރިހާ ކުދިންވެސް ވީހާވެސް އަވަހަށް ލައިސަންސް ނެގުމަށް އެމިކުފާނު އިލްތިމާސް ކުރެއްވިއެވެ.
މިހާރަކަށް އައިސް އެއްގަމު އުޅަނދު ލައިސެންސެއްނެތި ދުއްވާ ޒުވާނުން ވަރަށް ގިނައެވެ. ދުނިޔޭގެ ތަހުޒީބު އެއްވެސް ގައުމެއްގައި އެއްގަމު އިންޖީނުލީ އެއްވެސް އުޅަނދެއް، ލައިސަންސެއްނެތި ދުއްވުމަކީ މަނާކަމެކެވެ.
ނަމަވެސް ބައެއް ޒުވާނުންދަނީ ސޯސަލް މީޑިއާގައި (ލައިސަންސް ނެތި ދުއްވުމުން ފިޔަވަޅު އެޅުމުން) އެކަމާ ޝަކުވާކޮށް ހިތްހަމަ ނުޖެހުމުގެ ޝުއޫރުތައް ފާޅުކުރަމުންނެވެ. ކޮންމެހެން އެނގެން ޖެހޭ ގަވައިދާ އުސޫލުތައް ނޭންގި އެއްގަމު އުޅަނދުފަހަރު ދުއްވުމަކީ ކިހާ ނުރައްކާތެރިކަމެއްކަން އެފަރާތްތަކަށް އިހުސާސްނުވާކަހަލައެވެ.
