އެމްޑަބްލިއު އެސްސީ ގެ ބޯޑު މެމްބަރު އަދި ޗެއާޕާސަންގެ މަގާމަށް، މާލެ ސިޓީ ކައުންސިލުގެ އެގްޒެކެޓިވް ގެ މަގާމުގައި ހުންނެވި ސ.ފޭދޫ، ނާޒުކީގެ ޝަމްހޫޒާ އަހުމަދު ހަމަޖައްސައިފިއެވެ.
މީގެ އިތުރުން އެ ކުންފުނީގެ ބޯޑު މެމްބަރު ކަމުގައި ހުންނެވި ފާތުމަތު ހަނާ (ގ.ކުނބުރުދޫ) އަދި އަހުމަދު އީމާން އިސްމާއިލް (މ.ސީޑު) މަގާމުން ވަކިކޮށް، ބޯޑު މެމްބަރުކަމަށް ވަނީ އަބްދުއް ސަލާމު މުހައްމަދު (ހުޅުމާލެ ފްލެޓު 141-1-01) އައްޔަން ކޮށްފައެވެ.
ސަރުކާރުގެ ފެނާއި ނަރުދަމާގެ ހިދުމަތްދޭ ކުންފުނީގައި ކުރިން ހުންނެވީ އަހުމަދު މައުސޫމެވެ. ނަމަވެސް ރައީސް ނަޝީދުގެ ޑިމޮކްރެޓްސް ޕާޓީއާއި އެކު ކުރިއަށް ދިއުމަށް އެ މަގާމުންވަނީ އިސްތިއުފާ ދެއްވާފައެވެ.
ފެނާއި ނަރުދަމާ ހިދުމަތުގެ އިތުރުން ފުޅީގައި ބަންދުކުރާ ތާޒާ ފެން އުފައްދާ ކުންފުނީގެ މެނޭޖިންގ ޑިރެކްޓަރުގެ މަގާމަށް އައްޔަން ކޮށްފައިވަނީ އަބްދުލް މަތީން މުހައްމަދެވެ.
ރައީސް ޑރ. މުހައްމަދު މުއިއްޒުގެ އަރިހުގައި ސިޓީ ކައުންސިލުގައި މަސައްކަތް ކުރެއްވި މުއައްޒަފުންނާއި ސިޓީ ކައުންސިލުގެ ބައެއް އެޑްވައިޒަރުންނަށް ވަނީ މި ސަރުކާރުގެ މިނިސްޓަރު ކަމާއި އެނޫންވެސް އިސް މަގާމުތަކެއް ދެއްވާފައެވެ. މީގެ ތެރޭގައި ގައުމިއްޔަތާއި ބެހޭ މިނިސްޓަރ އާދަމް ނަސީރު، ހައުސިން މިނިސްޓަރ ޑރ.ހައިދަރު، ފޮރިން މިނިސްޓްރީގެ މިނިސްޓަރ ލެވެލުގައި އައްޔަންކޮށްފައިވާ މުހައްމަދު ހުސައިން ޝަެރީފު، ޔޫތު މިނިސްޓްރީގެ ޑެޕއިޓީ މިނިސްޓަރުން ކަމަށްވާ މަލްދާ އަދި ޝިއުނާ ހިމެނެއެވެ.
