ހއ.ދިއްދޫ ފެނަކައިގަ މަސައްކަތްކުރާ ކޮންޓްރެކްޓު މުއައްޒަފުންގެ ތެރެއިން 53 މުއައްޒަފުން ކުއްލިއަކަށް ވަކި ކުރުމުން އިޖުތިހާދު ކުރަން ފަށައިފިއެވެ.
ދިއްދޫ ފެނަކައިން ވަކި ކުރި މުއައްޒަފުން ބުނާ ގޮތުން އެމީހުންނަށް މީގެ ކުރިން އެއްވެސް އިންޒާރެއް ނުވަތަ ވަޒީފާއިން ވަކި ކުރާނެ ކަމުގެ އެއްވެސް ލިއުމެއްވެސް ދީފައި ނުވެއެވެ. އެ މުއައްޒަފުންނަށް ވަޒީފާއިން ވަކިކޮށްފައިވާކަން އެނގުނީ މިއަދު އޮފީހަށް އައިސް އޮފީހަށް ފިންގަރ ޖަހަން އުޅެއުޅެ ނުޖެހިގެން އިދާރީ މުއައްޒަފަކާއި ސުވާލު ކުރުމުންނެވެ. ބައެއް މުއައްޒަފުން ތުހުމަތުކުރާ ގޮތުގައި އެމީހުން ވަކި ކުރުމުގެ ކަންކަން އައީ ހީލަތްތެރި ރޭވުމެއްގެ ތެރެއިން ކަމަށާއި މި ގޮތުން މީގެ ކުރިން އޮފީހަށް އައިސް ހާޟީރީގައި ޖެހެނީ ސޮއިކުރަން ކަމަށެވެ. ނަމަވެސް ޖެނުއަރީ 15 އިން ފެށިގެން ހުރިހާ މުއައްޒަފުން ފިންގަރ ޕްރިންޓު (ހާޟިރީ މެޝނުގައި ފިންގަރ) ޖަހާގޮތް ވަނީ ހަދާފައެވެ. މި ގޮތަށް ހަމަޖެއްސިއިރު މި 53 މުއައްޒަފުންނަށް ވަނީ މި ކަން ނުކުރެވޭ ގޮތް ހަދާފައެވެ. އެހެންކަމުން ވަޒީފާއިން ވަކިކުރި ހުރިހާ މުއައްޒަފުންނަށް ލިބުނީ ވަރަށް ބޮޑު ޝޮކެއް ކަމަށެވެ.
އިޖުތިހާދު ކުރަމުންދާ އެހެން މުއައްޒަފަކު ބުނީ އުސޫލެއްގެ ގޮތުން ވަޒީފާއިން ވަކި ކުރުމަށް ނޯޓިސްއެއް ނުވަތަ ދުރާލާ އެހެން އެންގުމެއް އަންގަން ޖެހޭނެ ކަމަށާއި އޭރުން އެ ފަރާތްތަކަށް އިތުރު ވަޒީފާއެއް ހޯދުމަށް މަސައްކަތް ކުރަން އެނގޭނެ ކަމަށެވެ. ހާއްސަކޮށް ސަރުކާރު ބަދަލުވެ، ވެރިކަން ބަދަލުވުމުން ފެނަކައިގެ ސިޔާސަތުތައް ވެސް ބަދަލުވާނެ ކަން ބުނަން ވާނެ ކަމަށާއި، ކޮންޓްރެކްޓު މުއައްޒަފުންނަށް ވާނެ ގޮތް ވެސް އެނގެން ޖެހޭނެ ކަމަށެވެ.
ކޮންޓްރެކްޓު މުއައްޒަފުން ކަމަށް ބުނެ ސަރުކާރުގެ ބައެއް ކުންފުނިތަކުން އާދައިގެ މުއައްޒަފުން ވަކިކޮށް، ސަރުކާރުގެ މަތީ މަގާމުތަކާއި ކުންފުނިތަކުގައި އިތުރު މަގާމުތައް އުފައްދައި ސިޔާސީ ފަރާތްތައް އައްޔަން ކުރަމުންދާތީވެ އާއްމުންގެ ފާޑުކިއުން އަންނަނީ މި ސަރުކާރަށް ވަރަށް ބޮޑަށް އަމާޒުވަމުންނެވެ. ސަރުކާރަށް ދެމަސްވީ އިރު މި މުއްދަތުގައި 165 ޑެޕިއުޓީ މިނިސްޓަރުންނާއި، 91 ސްޓޭޓް މިނިސްޓަރުން އަދި 45 މިނިސްޓަރުން (މިނިސްޓަރުންގެ ފެންވަރުގައި އެކި ތަންތަނަށް އައްޔަށްކޮށްފައިވާ ފަރާތްތަކާއި އެކު) ޖުމްލަ 301 އަށްވަނީ އަރާފައެވެ. މީގެ އިތުރުން ގިނަ އަދަދެއްގެ ސިޔާސީ މަގާމުތަކެއް މިނިސްޓްރީ ތަކާއި ކުންފުނިތަކުގައި ހަދައި، އެ ވަޒީފާތަކަށް ވަނީ މީހުން އައްޔަން ކޮށްފައެވެ.
