ވެލާނާ އިންޓަނޭޝަނަލް އެއާޕޯޓް ތަރައްގީކުރުމަށް 100 މިލިއަން ޑޮލަރު އަދި ރާއްޖޭގެ ސިއްހީ ދާއިރާ ތަރައްގީ ކުރުމުގެ ކަންކަމަށް ސައުދީ ފަންޑުން 50 މިލިއަން ޑޮލަރު ދޭން ނިންމައިފި އެވެ.
ސިއްހީ ދާއިރާއަށް ލިބުނު އެހީގެ ދަށުން ހަމަޖެހިފައިވަނީ ރާއްޖޭގެ އެކި ހިސާބުތަކުގައި ހޮސްޕިޓަލުތަކެއް އެޅުމަށް ކަމަށް ސަރުކާރުން މައުލޫމާތު ދެއެވެ. މިއީ މިދިޔަ އަހަރުގެ ހައްޖުގެ މަތިވެރި އަޅުކަން އަދާކުރެއްވުމަށް ރައީސް ސޯލިހު ސައޫދީ އަށް ވަޑައިގެން އެ ގައުމުގެ ވިޔަފާރީގެ މިނިސްޓަރާ ބޭއްވި ބައްދަލުކުރެއްވުމުގައި ކުރެއްވި މަޝްވަރާތަކަށް ފަހު ހަމަޖެހުނު އެހީއެކެވެ.
ސައޫދީ ބިން ލާދިން ގްރޫޕާ ހަވާލުކޮށްގެން 2016 ވަނަ އަހަރު ރައީސް އަބްދުﷲ ޔާމީންގެ ސަރުކާރުން އެއާޕޯޓް ޓާމިނަލް ޕްރޮޖެކްޓް ފެށީ ހަތަރުން އަހަރުން ނިންމާ ގޮތަށް 300 މިލިއަން ޑޮލަރު (4.6 ބިލިއަން ރުފިޔާ) އަށެވެ. ނަމަވެސް ޕްރޮޖެކްޓް މުއްދަތަށް ނުނިންމުމުގެ ސަބަބުން އަގު ބޮޑުވެ ސަރުކާރުން ވަނީ 2021 ވަނަ އަހަރު ކުވޭތު ފަންޑުން 48.8 މިލިއަން ޑޮލަރުގެ ލޯނެއް ނަގައިފަ އެވެ.
މި ސަރުކާރުން މި މަސައްކަތަށް އިތުރު ބަދަލުތައް ގެނެސް، ކުރިއަށްވުރެ ބޮޑުކޮށް ޓާމިނަލް ހެދުމާއި ޑިޒައިންތައްވެސް ވަނީ ބަދަ ލުގެނެސްފައެވެ. ވެލާނާ އިންޓަނޭޝަނަލް އެއަރޕޯޓުގެ އާ ޓާމިނަލް ނިމޭއިރު ކުރިއަށްވުރެ ފުރިހަމަވާނެ ކަމަށް ސަރުކާރުން މައުލޫމާތުދެއެވެ.
މިއަދު ހަމަޖެހުނު ފައިސާގެ އެހީގެ ސަބަބުން އާ ސަރުކާރަށް އެއަރޕޯޓު އެއްވެސް ދަތިކަމެއް ނެތި ނިންމާލެވެން ޖެހޭނެ ކަމަށްވެސް ސަރުކާރުގެ އޮފިޝަލަކު މައުލޫމާތު ދެއްވިއެވެ. ރައީސް އިބްރާހިމް މުހައްމަދު ސޯލިހުވެސް ވިދާޅުވެފައިވަނީ އާ ސަރުކާރާއި ހަވާލުކުރާނީ ވެވެން އޮތް ހުރިހާ އެހީތެރިކަމާއެކުގައި ކަމަށާއި ސަރުކާރު ބަދަލުވިޔަސް އާ ސަރުކާރަށް ތަރައްގީގެ މަޝްރޫއު ތަކުގައި އެހީތެރިވެވަޑައިގަންނަވާނެ ކަމަށެވެ. އެމަނިކުފާނުގެ އުއްމީދަކީ އިންތިހާބީ ރައީސް ޑރ.މުއިއްޒުގެ ޒައާމަތުގައިވެސް އެއްވެސް ޕްރޮޖެކްޓެއް ނުހުއްޓި ކުރިއަށް ދިއުންކަމަށްވެސް ދެބޭފުޅުން ބައްދަލުކުރެއްވުމަށް ފަހު މީޑިއާއަށް ދެއްވި އިންޓަވިއުގައި ވިދާޅުވެފައިވެއެވެ.
