ރިޔާސީ އިންތިހާބުން ދެވަނަ ބުރަށް ހޮވޮފައިވާ ކެންޑިޑޭޓުންނަށްވެސް ޑިމޮކްރެޓްސް ގެ ތާއިދު ބޭނުން ކަމަށްވާ ނަމަ ސަރުތެއް ހުށައަޅާފައިވާ ކަމަށާއި އެއީ ނިޒާމު ބަދަލުކުރުމުގައި ބައިވެރިވުމަށް ކަމަށް ދަ ޑިމޮކްރެޓްސް ޕާޓީން ބުނެފިއެވެ.
ރިޔާސީ އިންތިހާބުގެ ފުރަތަމަ ބުރުގައި %45 އާއި އެކު އެންމެ ކުރި ހޯއްދެވި ޕީއެންސީގެ ޑރ. މުއިއްޒާއި، %39 ހޯއްދެވި މިހާރުގެ ރައީސް އަދި އެމްޑީޕީގެ ރިޔާސީ ކެންޑިޑޭޓު އިބްރާހިމް މުހައްމަދު ސޯލިހެވެ. މި ދެ ބޭފުޅުންނާ ދުރުން ތިންވަނަ ހޯއްދެވީ ދަ ޑިމޮކްރެޓްސް ގެ ކެންޑީޑޭޓް އިލިޔާސް ލަބީބެވެ، އިންތިހާބުގައި ވާދަކުރި ހުރިހާ ކެންޑީޑޭޓުންގެ ތާއިދު ހޯދުމާއި ކޯލިޝަން ހެދުމުގެ މަސައްކަތުގައި ކުރި ހޯއްދެވި ދެ ކެންޑިޑޭޓުން މަސައްކަތް ކުރަމުންދާއިރު ޑިމޮކްރެޓްސްއިން ވެސް ވަނީ ކޯލިޝަން ހެދުމަށް އެ ޕާޓީން ކޮމެޓީއެއް ނަގައި ނުރަސްމީ މަޝްވަރާތައް ފަށާފައެވެ. އެ ޕާޓީގެ މަޝްވަރާގެ އެންމެ މުހިއްމު ޝަރުތަކީ މިހާރުގެ ރިޔާސީ ނިޒާމުގެ ބަދަލުގައި ބަރުލަމާނީ ނިޒާމެއް ގާއިމު ކުރުމަށެވެ. ރާއްޖޭގެ ވެރިކަމުގެ ނިޒާމަށް އެންމެ އެކަށީގެންވަނީވެސް ބަރުލަމާނީ ނިޒާމު ކަމަށް އެ ޕާޓީން ދެކެއެވެ. ފެށުނީއްސުރެ ބަރުލަމާނީ ނިޒާމަށް ވަކާލާތުކުރާ ރައީސް ނަޝީދުގެ ލީޑަރުކަމުގައި ހިންގަމުންދާ ޑިމޮކްރެޓްސްއިން ބޭނުންވަނީ ދެވަނަ ބުރުގެ ވޯޓު ލުމުގެ ކުރިން މި މަހުގެ 25 ގައި ނިޒާމީ ވޯޓެއް ނެގުމަށެވެ.
އެ ޕާޓީން ދެ ކެންޑީޑޭޓުންނަށް ހުށައެޅި ނިޒާމު ބަދަލު ކުރުމުގެ މައްސަލާގައި މިހާތަނަށް އެއްވެސް ޖަވާބެއް ނުލިބެއެވެ. ރައީސް އިބްރާހިމް މުހައްމަދު ސޯލިހާއި ރައީސް ނަޝީދުގެ އެންމެ ބޮޑަށް ޖެހުނު އެއް މައްސަލައަކީ ވެސް ބަރުލަމާނީ ނިޒާމަށް ރައީސް ސޯލިހު ތާއިދު ނުކޮށް އެކަމަށް ވޯޓަކަށް އަހަންވެސް ބޭނުން ނުވުމެވެ. ޕީޕީއެމްގެ ބޮޑު ތާއިދަކާއެކު ނިކުތް ޑރ. މުއިއްޒަކީވެސް ރިޔާސީ ނިޒާމަށް ތާއިދުކުރާ ބަރުލަމާނީ ނިޒާމަށް އެއްވެސް ވަރަކަށް ތާއިދުކުރާ ބޭފުޅެއްނޫނެވެ.
