ގަލޮޅު ދެކުނު ދާއިރާގެ މެމްބަރު އިބްރާހިމް މުހައްމަދު ހިތް ހަމަ ނުޖެި އަޑުގަދަ ކުރުމުން އެންމެ ފަހުން ވޯޓަކަށް އަހައި، މާލެސިޓީ ކައުންސިލުގެ އެސްޖީ ވަޖީހު ނަސީރު ވަކިކޮށްފިއެވެ.
ޕީއެންސީގެ މެޖޯރިޓީ އޮންނަ ސިޓީ ކައުންސިލު މެމްބަރުންގެ ކަންބޮޑު ވުމަކީ ސިޓީ ކައުންސިލުގެ އެސްޖީ ބައެއް ބިލު ތަކަށް ފައިސާ ނުދައްކާ މައްސަލައެވެ. މި މައްސަލާގައި ރިޔާސަތުގައި އިންނެވި މާލޭ މޭޔަރު އާދަމް އާޒިމް ވިދާޅުވީ އެއްވެސް ލިޔެކިއުމެއް ނެތް ބިލު ތަކަށް ފައިސާއެއް ނުދެވޭނެ ކަމަށާއި ބައެއް މެމްބަރުން މި ތަނަށް ބިލުތަކެއް އަޅާލިޔަސް ފައިސާ ދިނުމުގައި ބަލަން ޖެހޭ ކަންކަން ހުންނަ ކަމަށެވެ. އާޒިމުގެ ވާހަކަ ކުރިއަށް ދަނިކޮށް ގަލޮޅު ދެކުނު ދާއިރާގެ މެމްބަރު އިބްރާހިމް މުހައްމަދު ވަނީ އަޑުގަދަކޮށް، މިއީ އެއްވެސް ބާރެއް ނެތް މެމްބަރުންތޯ ސުވާލު އުފައްދާ ވޯޓަކަށް އެހުމަށް އެދިފައެވެ. އިބްރާހިމް ތަކުރާރުކޮށް އަޑުގަދަކުރަން ފެށުމުން އެންމެ ފަހުން ވޯޓަކަށް އަހައި، ސިޓީ ކައުންސިލުގެ އެސްޖީ މަގާމުން ވަކިކުރަންވަނީ ފާސްކޮށްފައެވެ.
މި ވޯޓުގައި ސިޓީ ކައުންސިލުގެ މެމްބަރުން ކަމަށްވާ ސައިފު ފާތިހު އަދި އައިޝަތު ނާޒިމާ ބައިވެރިއެއް ނުވެއެވެ. ސައިފު ފާތިހުވެސް ވަނީ މެޔަރު އާޒިމުގެ ވާހަކައަށް ތާއިދުކުރައްވައި، ސިޓީ ކައުންސިލުގެ އެސްޖީ ޖަވާބުދާރީވުމަށް ފުރުސަތު ނުދީ ވަކި ނުކުރެވޭނެ ކަމަށްބުނެފައެވެ. ނާޒިމާވެސް ވިދާޅުވީ އެންމެ ފުރަތަމަ ކުރަންވީ ކަމަކީ އެސްޖީއަށް ކުރެވޭ ތުހުމަތު ތަކަށް ޖަވާބުދާރީ ވުމަށް ފުރުސަތު ދިނުމަށެވެ.
