ހުޅުމާލޭގައި ޕާކުކޮށްފައި އޮތް ވައި ވަގަށްނެގި ކާރެއް ހޯދައި އޭގެ ވެރިފަރާތާ ހަވާލުކޮށްފިއެވެ.
ފުލުހުން މައުލޫމާތުދޭ ގޮތުގައި މި ކާރު ޕާކު ކޮށްފައިވަނީ އެޕްރީލް 13 ވަނަ ދުވަހުގެ 23:50 އެހައިކަންހާއިރު ހުޅުމާލެ ފިތުރޯނު މަގުގައެވެ. ކާރުގެ ވެރި ފަރާތުން ކާރު ޕާކުކުރުމަށް ފަހު، 01:15 އެހައިކަންކާއިރު ކާރަށް އަރަންދިޔައިރު، ޕާކުކުރި ތަނުގައި ކާރު ނެތްކަމަށާއި ކާރުތެރޭގައި ތަޅުދަނޑި (ރިމޯޓު) ބޭއްވިފައިވާ ކަމަށް ބުނެ، ކާރުގެ ވެރިފަރާތުން ވަނީ ރޭ ފުލުހުންނަށް މައްސަލަ ހުށަހަޅާފައިވެއެވެ.
މި މައްސަލައާ ގުޅިގެން، ސީސީޓީވީ ކެމެރާ ފުޓޭޖު ބެލިބެލުމުން، އަންހެނަކާއި ފިރިހެނަކު އެ ކާރަށް އަރައިގެންދާ މަންޒަރު ފެނިފައިވެއެވެ. އަދި ކާރު އޮތް ސަރަހައްދު ދެނެގަނެ ފުލުހުން އެ ސަރަހައްދަށް ގޮސް ބެލިބެލުމުން ކާރުގައި އެއްވެސް މީހަކު ނެތްކަން އެނގިފައިވެއެވެ. އަދި ކާރުގެ ވެރިފަރާތް އެ ސަރަހައްދަށް ހާޒިރުކޮށް، ވެރިފަރާތުގެ ހާޒިރުގައި ކާރު ޗެކުކުރިއިރު ކާރަށް އެއްވެސް ގެއްލުމެއް ލިބިފައިނުވާ ކަމާއި ކާރުތެރޭގައި ބާއްވާފައި އޮތް ރިމޯޓު ނެތްކަމަށްވެސް ފުލުހުން މައުލާތު ދެއެވެ.
މި މައްސަލައާ ގުޅިގެން މީހަކު ހައްޔަރުކޮށްފައެއް ނުވެއެވެ.
