ރައްޔިތުންގެ މަޖުލީހަށް ވާދަކުރާ ޑިމޮކްރެޓްސް ޕާޓީގެ ކެންޑިޑޭޓުންތަކެއްގެ ޓިކެޓު ސަރުކާރު ހިންގާ ޕީއެންސީއަށް ދޫކޮށްލައިފިއެވެ. ’ފާރަވެރި މަޖުލީހަކަށް‘ އަދި ސަރުކާރު ޖަވާބުދާރީ ކުރުވަން ކަމަށް ބުނެ ކުރީގެ ރައީސް މުހައްމަދު ނަޝީދުގެ ތާއިދާއި އެކު ނިކުތް ދަ ޑިމޮކްޜެޓްސް ކެންޑިޑޭޓުންގެ ތެރެއިން މިއަދާހަމައަށް ބައެއް ކެންޑިޑޭޓުން ނުރަސްމީކޮަށްވެސް ވަނީ ޕީއެންސީގެ ކެންޑިޑޭޓުންނަށް ތާއިދުކުރަން ނިންމާފައެވެ. ރަސްމީކޮަށް ޓިކެޓު ދޫކޮށް ޕީއެންސީއަށް ތާއިދުކުރި ދާއިރާތަކުގެ ތެރޭގައި ތ.ގުރައިދޫ ދާއިރާއާއި ތ.ތިމަރަފުށި ދާއިރާ ހިމެނެއެވެ. މީގެ އިތުރުންވެސް ބައެއް އެހެން ދާއިރާތަކުން ޑިމޮކްރެޓްސްގެ ކެންޑިޑޭޓުން ގެ ތާއިދުކުރާ ޓީމުތައް އަންނަނީ ޕީއެންސީއާއި އެކު މަސައްކަތް ކުރަމުންނެވެ.
މީގެ އިތުރުން ބައެއް ދާއިރާތަކަށް ވާދަކުރާ ޑިމޮކްރެޓްސްގެ ކެންޑިޑޭޓުން ކެމްޕޭނު ކުރަމުންވެސް ނުދެއެވެ. ޑިމޮކްރެޓްސް މަގުސަދަކީ މި ފަހަރުވެސް އެމްޑީޕީގެ ކެންޑިޑޭޓުންނަށް ލިބޭ ވޯޓު މަދުކޮށް، ވޯޓު ބައިބައިކޮށްލުން ކަމަށް ބައެއް ފަރާތްތަށް ތުހުމަތު ކުރެއެވެ. މި ކަމަށް ބާރުލިބޭގޮތަށް އަންނަނީ ބައެއް ކެންޑިޑޭޓުން ކެމްޕޭނުގައި ވާހަކަވެސް ދައްކަމުންނެވެ. ޑިމޮކްރެޓްސް ގެ މަޖުލިސް ޓިކެޓު ދޫކޮށްލުމަށް ފަހު ވާދަވެރި ކެންޑިޑޭޓުންނަށް ތާއިދުކޮށް އެހެން ޕާޓީތަކުގެ ކެމްޕޭނު ތަކުގައި ހަރަކާތްތެރިވާ އެ ޕާޓީގެ މެމްބަރުންނާ މެދު މިހާތަނަށް އެއްވެސް ފިޔަވަޅެއް އަޅާފައިނުވެއެވެ.
ވަރަށް ޖޯޝާއި ފޯރީގައި އުފެއްދި ދަ ޑިމޮކްރެޓްސް ޕާޓީވަނީ ވަރަށް ބޮޑަށް ރޫޅިފައެވެ. އެ ޕާޓީގެ ސޯސަލް މީޑިއާ އެކްޓިވިސްޓުން ޕީއެންސީއާއި ގުޅިފައިވާއިރު، ގިނަ އަދަދެއްގެ މެމްބަރުންވަނީ ޕާޓީން އިސްތިއުފާދީފައެވެ. މީގެ ތެރޭގައި، އެތެރޭގެ އިންތިހާބު އޮޅުވާލިކަމަށް ބުނެ ޕާޓީން ވަކިވި އިސް މެމްބަރުންވެސް ހިމެނެއެވެ.
