ކޮވިޑް ގެ ހާލަތު އިތުރަށް ގޯސްވުމުން އަޅާފައިވާ ފިޔަވަޅުތަކާއި ހިލާފަށް، އެޗްޕީއޭއާއި ޕޮލހުންގެ ހުއްދަ ނެތި މާލެއިން ފުރައިގެން އއ. މަތިވެރިއަށް ދިޔަ ބަޔަކު ޖުރިމަނާކޮށް އަނބުރާ ފޮނުވާލައިފިއެވެ. މި މީހުންގެ ތެރޭޣައި ރައްޔިތުންގެ މަޖުލީހުގެ އިއްޒަތްތެރި މެމްބަރު އަބްދުﷲ ޖާބިރުވެސް ހިމެނޭ ކަމަށްވެއެވެ.
ރާއްޖޭގެ ކޮވިޑް ހާލަތު އެންމެ ގޯސްވިއިރުވެސް އަދި ފަހުން ދިން ލުއިތަކުގައިވެސް މާލެއިން ފުރައިގެން (މާލޭގަ ދިރިއުޅޭ މީހުން) އެހެން ރަށަކަށް ދެވެނީ ހާއްސަ ހުއްދައެއްގެ ދަށުންނެވެ. އަދި ބޮޑެތި މަސައްކަތްތަކާއި ސަރުކާރުގެ ބޭނުންތަކަށް ދާމީހުންނާއި ކުރުމުއްދަތަކަށް، 5 ދުވަހަށްވުރެ އިތުރު ނުވާ ގޮތަށް ރަށްރަށަށް ދެވެނީވެސް އެޗްޕީއޭގެ ހާއްސަ ހުއްދައެއް ނަގައިގެންނެވެ.
މި ދުވަސްވަރަކީ އަނެއްކާވެސް ރާއްޖޭގައި ކޮވިޑް ކޭސްތައް ގިނަވަމުން އަންނަ ދުވަސްކޮޅަކަށްވެފައި ކުރިން ދިން ލުއިތަކަށް ބަދަލު ގެނެސް މާލެގައިވަނީ ހަރުކަށި ފިޔަވަޅު އަޅާފައެވެ. މި ފިޔަވަޅު ތަކަސް ލުއި ލިބޭނީވެސް ކޮވިޑްކޭސް ތައް މަދުވެގެން ކަމަށާއި މި ކަމުގައި އާއްމުންގެ އެއްބާރުލުން ވީހާވެސް ބޮޑަށް ބޭނުންވާނެކަމަށް ތަކުރާރުކޮށް ޑޮކްޓަރުންނާ ހެލްތު ޕްރޮޓެކްޝަން އޮތޯރިޓީން ދަނީ އިލްތިމާސް ކުރަމުންނެވެ
