މާލެއިން މުދާ ބަރުކޮށްގެން ލ.އަތޮޅު ދަނބިދޫއަށް ދަތުރުކުރަމުންދިޔަ ’ބަސްމަލާ ’ ބޯޓު ނެރުމައްޗަކަށް އަރައި ކޯސްޓުގާޑުން އެހީތެެރިކަން ފޯރުކޮށްދޭން ފަށައިފިއެވެ.
އެމްއެންޑީއެފުން މައުލޫމާތުދޭ ގޮތުގައި ’ބަސްމަލާ‘ ބޯޓު ދަނބިދޫ ކައިރީގައި އޮންނަ ”ބިންމާދަނޑު“ ނެރަށް އެރީ އިއްޔެ ހެނދުނު އެރީ މާލެއިން މުދާ ބަރުކޮށްގެން ދަތުރު ކުރަމުން ދަނިކޮށް ކަމަށާއި އެ ދޯނީގައި ނުވަ ފަޅުވެރިން ތިބި ކަމަށެވެ. ނަމަވެސް ހާދިސާގައި އެއްވެސް ފަޅުވެރިއަކަށް އަނިޔާވެފައި ނުވާ ކަމަށް ބުންޏެވެ.
އެމްއެންޑީއެފުން ބުނީ، ހާދިސާގައި ބޯޓުގެ އިންޖީނު ކޮޓަރިއާ ދިމާލުން ފަސް ފޫޓު އަޑިއަށް ފަޅައިގެންގޮސްފައި އޮތްތަން ބެއްދުމަށް ކޯސްޓްގާޑުގެ ޑައިވަރުން މަސައްކަތް ކުރަމުންދާ ކަމަށެވެ.
