ގުޅިފަޅު ހިއްކުމުގެ ސަބަބުން ތިމާވެއްޓަށް ގެއްލުންވާ ކަމަށްބުނެ، ގުޅިފަޅު ތަރައްގީ ކުރުން ހުއްޓުވާލައިގެން އުޅެނީ ސަރުކާރުގެ ނުފޫޒުން ކަމަށް ކުރީގެ ހައުސިން މިނިސްޓްރީގެ ސްޓޭޓް މިނިސްޓަރ އަކުރަމް ކަމާލުއްދީން ތުހުމަތު ކުރައްވައިފިއެވެ. ސޯސަލް މީޑިއާ އެކްސްގައި ކުރެއްވި ޕޯސްޓެއްގައި ވިދާޅުވީ ސަރުކާރުގެ ނުފޫޒުން ގުޅިފަޅު ޕްރޮޖެކްޓު ހުއްޓުވާލުމުން ގެއްލުންވަމުންދާނީ ދިވެހިންނަށް ކަމަށާއި މިގޮތުން ހަމައެކަނި ފަޅު ހިއްކާ ކުުންފުންޏަށް ބަދަލެއްގެ ގޮތުގައި ދުވާލަކު 3 ލައްކަ ޑޮލަރު ދައްކަން ޖެހޭނެ ކަމަށެވެ. މިއީ ޓެކްސް ޕޭޔަރުންގެ ފައިސާ ކަމަށާއި ސަރުކާރުގެ ނާގާބިލުކަމުން ލިބޭ ގެއްލުން ކަމަށް އަކުރަމު ސިފަ ކުރެއްވިއެވެ. އަކުރަމަކީ ގުޅިފަޅާއި ހުޅުމާލެ 3 އަދި ގިރާވަރު ފަޅުން ގޯތި ދިނުމުގައި ކުރީ ސަރުކާރުން އެންމެ އިސްކޮށް އުޅުއްވި ފަރާތެވެ.
އަކުރަމުގެ އިތުރުން އިދިކޮޅު އެމްޑީޕީގެ އިސް ފަރާތްތަކުންނާއި އަދި ބައެއް އާއްމުންވެސް ތުހުމަތު ކުރަނީ ސަރުކާރު ހިންގާ ޕާޓީގެ ނުފޫޒުން ގުޅިފަޅު ތަރައްގީ ކުރުން ހުއްޓުވާލީ ކަމަށެވެ. މި ގޮތުން މީގެ ކުރިންވެސް ރައީސް ޑރ.މުއިއްޒުގެ ހައުސިން މިނިސްޓަރުކަމުގައި ގުޅިފަޅު ޕްރޮޖެކުޓު ވަނީ ހުއްޓުވާފައެވެ. އެ ފަހަރު ގުޅީފަޅުން ފުލެޓު ލިބުނު ފަރާތްތަކުން ފުލެޓު ލިޔުންތައްވެސް ބާތިލުކޮށް ގުޅިފަޅު ތަރައްގީ ކުރުން އޭރުގެ ސަރުކާރުގެ ސިޔާސަތު ތެރޭގައި ހިމެނޭ ކަމެއްނޫން ކަމަށްވަނީ އިއުލާންކޮށްފައެވެ. ގުޅިފަޅުން ފުލެޓު ލިބުނު ފަރާތްތަކަށް ބަދަލުގެ ގޮތުގައި ކުރީ ސަރުކާރުން ވަނީ ހުޅުމާލެއިން ފުލެޓު ހަމަޖައްސައިދީފައެވެ. މީގެ އިތުރުން ގުޅީފަޅުގައި މައި ބަނދަރު ހެދުންވެސް މި ސަރުކާރުން ދެކޮޅެވެ. ރައީސް ނަޝީދުގެ ވެރިކަމުން ފެށިގެން އެމްޑީޕީ ނިސްބަތްވާ ވެރިކަންތަކުގައި ރާއްޖޭގެ މައި ބަނދަރު (އެމްޕީއެލް ސަރަހައްދު) އެކީގައި ބަދަލު ކުރަން ނިންމާފައިވަނީ ގުޅިފަޅަށެވެ. ނަމަވެސް މި ސަރުކާރުން ބުނެފައިވަނީ ގުޅީފަޅުގެ ބަދަލުގައި ޕޯޓު ހަދާނީ ތިލަފުށީގައި ކަމަށެވެ.
ގުޅީފަޅުން ގޯތި ލިބުނު ފަރާތްތަކުން ޝަކުވާ ކުރަނީ ދާދި އިހަކަށް ދުވަހު އީއައިއޭވެސް ނުހަދާ ކުއްލިއަކަށް ފެށި ރަސްމާލެ ހިއްކުން ނުހުއްޓުވައި ގުޅީފަޅު ހިއްކުން ހުއްޓުވީ މައްސަލައެވެ. ރަސްމާލެ ސަރަހައްދާއި ފަޅުގައިވެސް ރިސޯޓުތަކާއި ޑައިވިން ޕޮއިންޓުތައް ހުރިއިރު ގުޅީފަޅުގައި އެއްވެސް ރިސޯޓެއްނެތް އަދި ކުރިންވެސް އެއްބައި ހިއްކާފައިވާ ތަނަކަށް ކުއްލިއަކަށް ކޯޓު އަމުރެއް ނެރެ ހުއްޓުވާލީ ސިޔާސީ ސަބަބެއް އޮވެގެން ކަމަށް ކުރެވޭ ތުހުމަތު ޔަގީން ކުރެވޭ ކަމަށް އެފަރާތްތަކުން ދެކެއެވެ.
ގުޅިފަޅު ޕްރޮޖެކުޓު ހުއްޓުވުމަށް ކޯޓަށް މައްސަލަ ހުށައަޅާފައިވާ ހުމެއިދާ އަބްދުލް ގަފޫރަކީ މިސަރުކާރު ހިންގާ ސިޔާސީ ޕާޓީއަކަށް ނިސްބަތްވާ ސިޔާސީ އިސް އެކްޓިވިސްޓެކެވެ.
