މަސްތުވާތަކެތީގެ މައްސަލައެއްގައި މިއަދު ހައްޔަރުކުރި ރެޕަރ ޕެސްޓު އިސްމާއިލް އިފްހާމް (ޕެސްޓު) ގެ ބަންދުގެ މުއްދަތު 15 ދުވަހަށް ކުރިމިނަލް ކޯޓުން ޖަހައިފިއެވެ. ގިނަ އަދަދެއްގެ މަސްތުވާތަކެއްޗާ އެކު ހައްޔަރުކުރި ޕެސްޓުގެ މުއްދަތު ޖަހަން މިއަދު ކޯޓަށް ހާޟިރުކުރީ މިމައްސަލާގައި ހިމެނޭ އެހެން މީހުންނާވެސް އެކުގައެވެ.
ސިމްބޮލިކްސް ރިކޯޑުގެ އެއް ފައުންޑަރ އަދި ދިވެހި ޒުވާނުންގެ މެދުގައި މަޝްހޫރު ޕެސްޓަކީ މީގެ ކުރިންވެސް ލަވަ ކިއުމުގެ ދާއިރާއިން ދުރަށް ގޮސްފައިވާ ފަންނާނެކެވެ. އޭރު ރަހުމަތްތެރިން ބުނަމުން ދިޔައީ ’ސުންނަތަށް‘ އުޅުމަށް ލަވައާއި މިއުޒިކާ ދުރުވީ ކަމަށެވެ. ނަމަވެސް އޭގެ ފަހުން އެނބުރި އައިސް ގިނަ އަދަދެއްގެ ލަވައާއި ވީޑިއޯ ހަދާފައިވެއެވެ. މިގޮތުން ދާދި ފަހުންވެސް ވަނީ ’ކޯވަރެއް‘ ގެ ނަމުގައި ލަވައެއް ނެރެފައެވެ.
