ރާއްޖޭގެ މަޝްހޫރު ރެޕް އާޓިސްޓު އަދި ސިމްބޮލިކް ރެކޯޑްސްގެ އެއް ފައުންޑަރ އިސްމާއިލް އިފްހާމް މުހައްމަދު، މަސްތުވާތަކެއްޗާއި އެކު މިއަދު ހައްޔަރުކޮށްފިއެވެ. ރެޕް އާޓިސްޓެއްގެ ގޮތުގައި ރާއްޖޭގައި އެންމެ މަގުބޫލުކަމެއް ހޯދާފައިވާ އިފްހާމު ނުވަތަ ރެޕް ގެ ދުނިޔޭގައި ޕެސްޓު ގެ ނަމުން މަޝްހޫރުވެފައިވާ އިފްހާމް ހައްޔަރުކުރީ ޕޮލިހުން މިހާރު ކުރިއަށް ގެންދާ މަސްތުވާ ތަކެތީގެ އޮޕަރޭޝަންތަކެއްގެ ތެރެއިންނެވެ. މިގޮތުން ވޭތުވެދިޔަ ހަފްތާއެއްހާ ދުވަހުގެ ތެރޭގައި ގިނަ އަދަދެއްގެ ބަނގުރަލާ މަސްތުވާތަކެތި، ހުޅުމާލޭ، މާލެ، ވިލިމާލެ އަދި ބައެއް އަތޮޅުތަކުން އަތުލައިގަނެފައިވެއެވެ. މުރާސިލަށް އެނގިފައިވާ ގޮތުގައި ޕެސްޓު ހައްޔަރުކުރީ ގިނަ އަދަދެއްގެ މަސްތުވާތަކެއްޗާއެކު ރޭގެ ވަގުތެއްގައެވެ.
ޕެސްޓަކީ މިއުޒިކީ ދާއިރާއިން ހިޕްހޮޕާއި ރެޕުގައި ދިވެހި ޒުވާނުންގެ މެދުގައި މަގުބޫލު ފަންނާނެކެވެ. ސިމްބޮލިކް ރެކޯޑްސް ގެ ދަށުން ނެރުނު ގިނަ ލަވަތަކާއި ވީޑިއޯ ލަވަތަކެއްގައި ވެސް އެންމެ މުހިއްމު އެއް ފަންނާނަކީ ޕެސްޓެވެ.
މީގެ ކުރިންވެސް ޕެސްޓު ވަނީ ލަވައާއި މިއުޒިކުން ދުވަސްކޮޅަކަށް ގެއްލިފައެވެ. އެފަހަރު ޕެސްޓުގެ ގާތް ރަހުމަތްތެރިން ބުނަމުން ދިޔައީ ’ސުންނަތަށް‘ ބަދަލުވީ ކަމަށެވެ. ނަމަވެސް ރާއްޖޭގެ މީޑިއާއަކަށް ޕެސްޓު ދީފައިވާ އިންޓަވިއުއެއްގައި އެކަން ސީދާ ދޮގު ނުކޮށް، ލަވައާއި މިއުޒިކާ ދުރަށް ދިއައީ ’ދިރިއުޅުމަށް އައި ބަދަލަކުން ’ ކަމަށް ބުނެފައިވެއެވެ. އަދި ކުރިއަށް އޮތްތާގައި ވާނެ ގޮތެއް ނޭންގޭ ކަމަށާއި ދިރިއުޅުމަކީ މޫވްމަންޓުތަކެއް ކަމަށް ސިފަކޮށް އެއީ ދިރިއުޅުން ކަމަށްވެސް އެ އިންޓަވިއުގައި ޕެސްޓު ބުނެފައިވެއެވެ
