މާޗު މަހުގެ 15ގެ ކުރިން އިންޑިއާ ސިފައިން އަނބުރާ ގެންދިއުމަށް ރައީސް ޑރ، މުހައްމަދު މުއިއްޒު، އިންޑިއާ ސަރުކާރުގައި މިއަދު އެދިވަޑައިގެންފިއެވެ.
ވަޒީރުންގެ މަޖިލީހުގެ ނިންމެވުންތައް ހާމަކުރަން ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ޕަބްލިކް ޕޮލިސީ ސެކްރެޓަރީ އަބްދުﷲ ނާޒިމް ވިދާޅުވީ، މާޗު 15ގެ ކުރިން އިންޑިއާ ސިފައިން އަނބުރާ ގެންދިއުމަށް ރައީސް އެދިވަޑައިގެންފައިވާ ކަމަށެވެ.
އިންޑިއާ ސިފައިން ފޮނުވައިލުމާ ގުޅޭ ގޮތުން މަޝްވަރާކުރަން ދެ ގައުމުން ވަނީ މަތީ ފަންތީގެ ކޯ ގްރޫޕެއް އެކުލަވާލައިފައެވެ. އެ ގްރޫޕުގެ ބައްދަލުވުމެއް މިއަދު ހެނދުނުން ފެށިގެން ފޮރިން މިނިސްޓްރީގައި އަންނަނީ ބާއްވަމުންނެވެ. އެ ބައްދަލުވުމުގައި އިންޑިއާއިން ރާއްޖެއަށް ކަނޑައަޅުއްވާފައި ހުންނަވައި ސަފީރު ވެސް ބައިވެރިވެވަޑައިގަންނަވައެވެ.
”އިންޑިއާ ސިފައިންނަކަށް ރާއްޖެއަކު ނުތިބެވޭނެ. އެއީ ރައީސް ޑރ. މުހައްމަދު މުއިއްޒުގެ ސިޔާސަތަކީ، އެއީ ސަރުކާރުގެ ސިޔާސަތަކީ، މީގެ އިތުރުން އެއީ ރައީސް މުއިއްޒުގެ ރިޔާސީ ވައުދެއް، ”ނާޒިމް ވިދާޅުވިއެވެ
އިންޑިއާއިން ހަދިޔާކޮށްފައިވާ ޑޯނިއާ މަތިންދާބޯޓާއި ހެލިކޮޕްޓަރ ދުއްވުމަށް ރާއްޖޭގައި 88 އިންޑިއާ ސިފައިން ހަރަކާތްތެރިވެއެވެ.
