ރައީސުލްޖުމްހޫރިއްޔާ ޑރ.މުހައްމަދު މުއިއްޒު، ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސްޕަރސަން ކަމުގެ މަގާމަށް މުޙައްމަދު ޝަހީބު، ހ. ރީތިގަސްދޮށުގެ މިއަދު ޢައްޔަނުކުރައްވައި މަގާމުގެ ފަތްކޮޅު ދެއްވައިފިއެވެ. މިކަމަށްޓަކައި ބޭއްވި ރަސްމިއްޔާތު އޮތީ މިއަދު ރައީސުލްޖުމްހޫރިއްޔާގެ އޮފީހުގައެވެ.
ޝަހީބަކީ 30 އަހަރަށް ވުރެ ގިނަ ދުވަހު އެންމެ މަތީ ފެންވަރުގައި ނޫސްވެރިކަން ކުރައްވާފައިވާ ބޭފުޅެކެވެ. މިގޮތުން، 2004 ވަނަ އަހަރު، ޚަބަރާއި މަޢުލޫމާތު ފެތުރުމުގެ ދާއިރާއިން؛ ނޫސްވެރިކަމުގެ ރޮނގުން ހިތްވަރުދިނުމުގެ ޢާންމު ޚިދުމަތުގެ އިނާމު ޝަހީބަށް ވަނީ ލިބިވަޑައިގެންފައެވެ. މީގެ އިތުރުން ވެސް 2007 ވަނަ އަހަރު، ދިވެހި އަދަބިއްޔާތަށް ޚިދުމަތް ކުރުމުގެ ދާއިރާއިން؛ ދިވެހިބަހަށް ޚިދުމަތް ކުރުމުގެ ރޮނގުން ހިތްވަރުދިނުމުގެ ޢާންމު ޚިދުމަތުގެ އިނާމުވެސް ލިބިވަޑައިގެންފައިވެއެވެ.
2019 ވަނަ އަހަރު ނޫސްވެރިކަމުގެ އަލިމަސް ގަލަން ވެސް ޝަހީބު ވަނީ ހާސިލުކުރައްވާފައެވެ. އަދި މީގެ ކުރިން ޝަހީބް ވަނީ ބްރޯޑްކާސްޓިންގ ކޮމިޝަންގެ ރައީސްކަން ވެސް ކުރައްވާފައެވެ.
ނޫސްވެރިކަމުގެ ދާއިރާގައި ޝަހީބު އެންމެ ފާހަގަ ކުރެވުނީ ހަވިރު ނޫހާއި ހުވާސް މަޖައްލާގައި ކުރެއްވި މަސައްކަތްތަކަށެވެ. ހަވިރުގެ އިސް މަގާމުތަކެއް ފުރުއްވަމުން ހުވާސް މަޖައްލާގައި ތަފާތު މޮޅު ލިޔުންތަކެއް ގެނެސްދެއްވާފައިވަނީ ޝަހީބުގެ އެޑިޓަރުކަމުގެ ދަށުގައެވެ. ހަވީރުގައި މަސައްކަތްކުރެއްވުމަށްފަހު، ސަން މީޑިގައިވެސް މުހިއްމު މަސައްކަތްތަކެއް ކުރެއްވިއެވެ. ނޫސްވެރިކަމުގެ ދާއިރާގައި މިވަގުތު ޝަހީބުގެ އަމިއްލަ ނޫހެއް ’އަދިވެސް‘ ނަމުގައި އަންނަނީ ހިންގަމުންނެވެ.
