ރައްޔިތުން މަޖުލީހުގެ ރައީސް މުހައްމަދު ނަޝީދު އިތުބާރު ނެތް ކަމުގެ މައްސަލާގައި ހުއްޓިފައިވާ މަޖުލީހުގެ ޖަލްސާތައް ފެށުމަށް ކޮމެޓީން ފާސްކުރިގޮތަށް ޖަލްސާތައް ބޭއްވުމަށް އަނެއްކާވެސް ހުރަސްތަކެއް ކުރިމަތިވެއްޖެއެވެ. މިހާރު ޖެހިގެން އުޅޭ މައްސަލައަކީ ނައިބް ރައީސް އީވާ އަބްދުﷲ ރިޔާސަތުން ފައިބަން ދެކޮޅު ހެދުމުން މަޖުލިސް ހުއްޓިފައި އޮތުމެވެ. ރައްޔިތުން މަޖުލީހުގެ ރައީސް މުހައްމަދު ނަޝީދުގެ ކޮއްކޮ އީވާ އަބްދުﷲ ވެސް ވަނީ ނަޝިދު އިތުބާރު ނެތް ކަމުގެ ޖަލްސާ ކުރިއަށް ގެންދަން ދެކޮޅު ހަދާފައެވެ.
އީވާ ސަލާމުގައި ހުރުމުން އިއްޔެގެ ޖަލްސާ ގެ ރިޔާސަތު ބެލެހެއްޓެވި ހަސަން އަފީފުވެސް ވަނީ ނަޝީދުގެ މައްސަލަ ކުރިއަށް ގެންދަން ދެކޮޅު ހަދާފައެވެ. މި ދެބޭފުޅުންނަކީވެސް ނަޝީދު ނިސްބަތްވާ ޑިމޮކްރެޓްސް ޕާޓީގެ ދެ މެމްބަރުންނެވެ. ޑިމޮކްރެޓްސް ޕާޓީން ނިންމާފައިވަނީ މަޖުލީހުގެ ރައީސް އިތުބާރު ނެތް ކަމުގެ ޖަލްސާތަކަށް ހުރަސްއަޅާ ޖަލްސާތައް ކުރިއަށް ނުގެންދިއުމަށް ކުރެވެން ހުރި ކަމެއް ކުރުމަށެވެ. މި ކަމުގެ ސަބަބުން މަޖުލީހުގެ ކޮމެޓީން ނިންމާފައިވަނީ ނަޝީދުގެ ޑިމޮކްރެޓްސް ޕާޓީއަށް ނިސްބަތްވާ މެމްބަރުން ފިޔަވައި އެހެން މެމްބަރެއްގެ ރިޔާސަތުގައި ޖަލްސާތައް ފެށުމަށެވެ. މި މައްސަލާގައި އަމީންއާއްމު އަދި އިދާރީ މޭޒުގެ އެއްބާރުލުން ނުލިބި ގިނަ އިރުތަކެއް ވުމަށް ފަހު މިހާރު އިދާރީ މޭޒުންނާިއ އަމީންއާއްމުވެސް ވަނީ އީވާ ރިޔާސަތުން ފައިބަށް އެދިފައެވެ. މަޖުލީހުގެ މެމްބަރަކު ވިދާޅުވީ އަމީންއާއްމަށް އީވާ ދެއްވި ޖަވާބަކީ ތިމަންނަ މި ގޮނޑިން ބޭލޭނެ އެއްވެސް ބާރެއް މި ދުނިޔޭގައި ނުވާނެ ކަމަށެވެ.
