ފަލަސްތީނުގެ ގާޒާ ރައްޔިތުން އެ ސިޓީ ދޫކޮށް ދިއުމަށް ދީފައިވާ 24 ގަޑިއިރުގެ މުހަލަތަށް ފަހު މަސްރަހު ވަރަށް ތަފާތުވާނެ ކަމަށާއި، އިޒްރޭލުގެ އަދުއްވުން ނައްތާލުމުގެ މަސައްކަތް އަދި ކިރިޔާ މި ފެށުނީ ކަމަށް ނަތަންޔާހޫ ބުނެފިއެވެ.
އިޒްރޭލުގެ ބޮޑުވަޒީރު މި މޭރުމުން ވާހަކަދެއްކީ 3 ދުވަސް ވަންދެން ގާޒާއަށް ބޮން އަޅާ އެތައް ބަޔަކު މަރާ ގެދޮރު ގެއްލިފައިވަނިކޮށް، ގާޒާގެ ރައްޔިތުން އެ ސިޓީ ދޫކޮށް ދިއުމަށް ދީފައިވާ 24 ގަޑިއިރުގެ މުހުލަތާ ބެހޭ ގޮތުން ކުރިމަތިވި ފާޑުކިޔުންތަކަށް ރައްދު ދެމުންނެވެ. މިހާތަނަށް ގާޒާގެ އެތަންމިތަނަށް 6000އަށް ވުރެ ގިނަ ބޮން އަޅާ އެތައް ސަތޭކަ ގެދޮރެއް ސުންނާފަތި ކުރުމަކީ އެއްވެސް ކަމެއް ނޫންކަމަށް ދޭހަވާ މޭރުމަކުން މީގެ ކުރިންވެސް ވަނީ ވާހަކަދައްކާފައެވެ. އިޒްރޭލުން މިހާރު ރާވަމުންދަނީ އެއްގަމު މަގުން ގާޒާގެ ތެރެއަށް ވަދެގަތުމަށެވެ. މިކަމަށް ތައްޔާރުކޮށްފައިވާ ވަރުގަދަ ލަަޝްކަރެއް، ބަރުހަތިޔާރާއެކުވަނީ ގާޒާގެ ބޯޑަރުކައިރިއަށް ޖަމާކޮށްފައެވެ. ނަތަންޔާހޫ އިޝާރާތްކުރަނީ އެ ލަޝްކަރު ބިންމަތީގެ ހަމަލާތަކުގެ ފެށުމަކީ ހަމާސް އެކީ ނައްތާލުމުގެ މަސައްކަތް ކަމަށާއި އެއީ ފެށުމެއް ކަމަށް ބުނަނީ އެ ކަމަށް އިޝާރާތްކޮށް ކަމަށް މެދުއިރުމަތީގެ ކަންކަން ދިރާސާކުރާ ފަރާތްތަކުން ލަފާކުރެއެވެ.
