ދިވެހިރާއްޖެއާއި ދިވެހިން ތިބީ ފަލަސްތީނާއެކު ކަމަށް މުޅި ދުނިޔެއަށް ދައްކާލަން ބޭނުން ކަމަށްބުނެ ރާއްޖޭގެ އެކި ކަންކޮޅުތަކުގައި މިއަދު އެއްވުންތަކާއި ހިނގާލުންތައް ބާއްވައިފިއެވެ. މިއަދުގެ މި އެއްވުންތަކުގެ މައިގަނޑު މަގުސަދަކީ އިޒްރޭލުގެ އަނިޔާވެރި ސިފައިން ދެމުންދާ ހަމަލާތަކުގައި ޝަހީދުވަމުންދާ ފަލަސްތީނު ރައްޔިތުންނާއި އަނިޔާ ލިބެމުންދާ ފަލަސްތީނު ރައްޔިތުންގެ ހައްގުގައި ބޭއްވި އެއްވުންތަކެކެވެ.
މި ހަރަކާތުގައި ރާއްޖޭގެ އެކި ކަންކޮޅުތަކުގައި އެއްވުންތަކާއި ހިންގާލުންތަކުގެ އިތުރުން ސައިކަލު ބުރުތައް ބާއްވާފައިވާއިރު މި ހަރަކާތްތަށް ބާއްވާފައިވަނީ އިންޓަނޭޝަނަލް އެއިޑް ކެމްޕެއިން (އައިއޭސީ) އާއި މަދަނީ ޖަމިއްޔާތަކާއި ކައުންސިލްތައްވެސް ގުޅިގެންނެވެ.
މާލޭގައިވަނީ ޒުވާނުންގެ ސައިކަލު ބުރެއްގެ އިތުރުން ހިނގާލުމަކާއި އެއްވުމެއް ބާއްވާފައެވެ. ސައިކަލު ބުރުގައި ރަސްފަންނުން ފަށައިގެން މަޖީދީމަގުންގޮސް ހެންވޭރުކޮޅުން ބޮޑުތަކުރުފާނުމަގަށް ނުކުމެ، އެމަގުން ދެން ދިޔައީ އުސްފަސްގަނޑަށެވެ.
ހަރަކާތުގައި ބައިވެރިވި ކުދި ބޮޑު ދިވެހީން ތިބީ ފަލަސްތީނުގެ ދިދަޔާއި ޝުއޫރު ލިޔެފައިވާ ބެނާތަކާއި ބޯޑުތައް ހިފައިގެންނެވެ.
މިއަދުގެ ހުކުރު ހުތުބާވެސް ހާއްސަކޮށްފައިވަނީ ފަލަސްތީނަށް އިޒްރޭލުގެ ސިފައިންދެމުންދާ ހަމަލާތަކާ ދެކޮޅަށް މުސްލިމުން އެކަތިގަނޑަކަށްވެ އެއްބައިވުމާ ބެހޭގޮތުންނެވެ.
