އަންނަ އަހަރަށް ލަފާކުރާ ދައުލަތުގެ ބަޖެޓެއްގެ ގޮތުގައި 41 ބިލިއަން ރުފިޔާގެ ބަޖެޓެއް ހުށަހަޅާނެ ކަމަށް ފިނޭންސް މިނިސްޓަރު އިބްރާހިމް އަމީރު މިއަދު ވިދާޅުވެއްޖެ އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި އަމީރު ވިދާޅުވީ އަންނަ އަހަރު 41.5 ބިލިއަން ރުފިޔާގެ ބަޖެޓެއް ހުށަހަޅާނެ ކަމަށް މި ވަގުތު ފިސްކަލް ސްޓްރެޓަޖީތައް ހުރިގޮތުން ލަފާކުރެވޭ ކަމަށެވެ. އަދި ބަޖެޓް އެކުލަވާލުމުގެ މަސައްކަތް ކުރިއަށް ދާ ކަމަށް އޭނާ ވިދާޅުވި އެވެ.
”އަޅުގަނޑުމެންގެ އަމާޒަކީ ފިސްކަލް ސްޓްރެޓަޖީއާ އެއްގޮތަށް ބަޖެޓް ހުށަހެޅުން. އަޅުގަނޑުމެން މަސައްކަތް ކުރަމުން މިދަނީ 41.5 ބިލިއަން ރުފިޔާގެ ބަޖެޓަކަށް. ދެން ޕޮލިސީ ލެވަލްގެ ޑިސްކަޝަންސްތަކާ އެކީގައި އެ އަށް ވުރެ ކުޑަވުމަކީ ނުވަތަ އެއަށް ވުރެ މަތިވުމަކީ ވެސް އެކަށީގެންވާ ކަމެއް،“ އަމީރު ވިދާޅުވި އެވެ.
އޭނާ ވިދާޅުވީ ދައުލަތަށް އާމްދަނީގެ ގޮތުގައި 30 ބިލިއަނަށް ވުރެ ގިނަ ރުފިޔާ ލިބޭނެ ކަމަށް ލަފާކުރާ ކަމަށާއި އަދި މިއަހަރު ނިމުމުގެ ކުރިން އާމްދަނީގެ ގޮތުގައި 24.9 ބިލިއަން ރުފިޔާ ލިބޭނެ ކަމަށް ލަފާ ކުރެވޭ ކަމަށް ވިދާޅުވި އެވެ.
އަމީރު ވިދާޅުވީ ލަފާކުރި ވަރަށް ވުރެ ރާއްޖޭގެ އިގްތިސާދީ ހާލަތު ރަނގަޅު ކަމަށާއި އެކަމަކު މަސައްކަތް ކުރަން ޖެހިފައި އޮތީ ބަދަލުވަމުންދާ ހާލަތެއްގައި ކަމަށެވެ. އަދި ޓޫރިސްޓުން ރާއްޖެ އަންނަ އަދަދު ވެސް ކޮވިޑް-19 ގެ ހާލަތު ކުރިއާ އެއްވަރަކަށް ކަމަށާއި މި އަހަރަށް ލަފާކުރާ 1.6 މިލިއަން ޓޫރިސްޓުން އަންނާނެ ކަމަށް ބެލެވޭ އޭނާ ވިދާޅުވި އެވެ.
މީގެ އިތުރުން މިނިސްޓަރ އަމީން ވަނީ ފިޗުން ރާއްޖޭގެ ކްރެޑިޓް ރޭޓިންއާ ބެހޭގޮތުންވެސް ނޫސްވެރިންނަށް މައުލޫމާތު ދެއްވާފައެވެ. މފިނޭންސް މިނިސްޓަރު އިބްރާހީމް އަމީރު ވިދާޅުވީ ފިޗުން ވަނީ ރާއްޖޭގެ ކްރެޑިްޓް ރޭޓިން އެއް ހަމައެއްގައި ދަމަހައްޓައިފައި ކަމަށެވެ.
”ދުނިޔޭގެ ވެސް ގައުމުތަކުގައި އިގްތިސާދީ އައުޓްލުކް ނެގެޓިވް. އެހެންވީމަ ރާއްޖޭގެ ވެސް އައުޓްލުކް މީންދީ ނެގެޓިވް ގައި. އެކަމުވެސް ރޭޓިން އިނީ އެއްހަމައެއްގައި ހިފަހައްޓައިފަ،“ އޭނާ ވިދާޅުވިއެވެ.
އެންމެ ފަހުން މިދިޔަ އަހަރުގެ އޮކްޓޯބަރު މަހު ފިޗުން ރާއްޖޭގެ ކްރެޑިޓް ރޭޓިން ބީ ނެގެޓިވްއަށް ބަދަލުކުރުމުގެ ކުރިން ރާއްޖޭގެ ރޭޓިން ހުރި ސީސީސީގައެވެ.
މިދިޔަ އަހަރު ރާއްޖޭގެ ރޭޓިން ބީ ނެގެޓިވްއަށް މަތިކުރީ އެ އިދާރާއިން ރާއްޖޭގެ އިގްތިސާދީ ހާލަތު އޮންނާނެ ގޮތް ލަފާކުރި ވަރަށްވުރެ އިތުރަށް އިގްތިސާދު ރަނގަޅުވެފައިވާތީކަމަށް ފިޗުން ބުނެފައިފައިވެއެވެ.
އެގޮތުން ކޮވިޑާއެކު ރާއްޖޭގެ ފަތުރުވެރިކަން ވަޅުޖެހިފައި އޮތުމަށްފަހު ލަފާކުރި މިންވަރަށްވުރެ އަވަސް މިނެއްގައި ކުރިއަރައިގެން އައިސްފައިވާ ކަމަށް ފިޗުގެ ރިޕޯޓުގައި ވަނީ ބުނެފައެވެ.
ނަމަވެސް ކުރިއަށް އޮތްތަނުގައި ވެސް ދައުލަތުގެ ދަރަނީގެ ހާލަތު އޮންނާނެ ގޮތަކާމެދު ފިޗުން އޭރު ވަނީ ސުވާލު އުފައްދައިފައެވެ.
މިއަހަރު ފިޗުން ރާއްޖޭގެ ރޭޓިން އެއް ހަމައެއްގައި ހިފައްޓައިފައިވާއިރު ދުނިޔޭގެ ގިނަ ގައުމުތަކުގެ އިގްތިސާދުގެ އައުޓްކަމް ދަނީ ނެގެޓިވް ވަމުންނެވެ.
ފިޗް ރޭޓިންސް ކުންފުންޏަކީ ދުނިޔޭގެ އެންމެ ބޮޑު ތިން ކްރެޑިޓް ރޭންކިން އެޖެންސީގެ ތެރެއިން އެއް އެޖެންސީއެވެ.
ކްރެޑިޓް ރޭޓިން އަކީ އިންވެސްޓަރުންނަށް އެމީހުންގެ އިންވެސްޓުމެންޓުގެ ފައިދާ ނެގޭނެ މިންވަރާއި އެ ގައުމެއްގެ ދަރަނި އަދާކުރުމުގެ ގާބިލުކަން ހުރި މިންވަރު އަންދާޒާ ކުރެވޭ އިންޑިކޭޓާއެކެވެ.
އިންވެސްޓަރުންގެ އިތުބާރު ހޯދުމަށް ރަނގަޅު ކްރެޑިޓް ރޭޓިން އެއް މުހިންމު ވަނީ މި ސަބަބާހުރެއެވެ.
