މި ދުވަސްވަރު ރާއްޖޭގެ ބޮޑު ބަޔަކަށް ކަނޑު ގަދަވެ ވިއްސާރަ ކުރަމުންދާތީވެ، ކަނޑު ދަތުރުފަތުރު ކުރާ އުޅަނދު ފަހަރު ސަމާލު ވުމަށް އެމްއެންޑީއެފުން އިލްތިމާސްކޮށްފިއެވެ.
އެމްއެެންޑީއެފުން ބުނީ ރާއްޖޭގެ ސަރަހައްދުގައި ހުޅަނގު މޫސުމުގެ ބާރުގަދަވެ ކުރިއަށް އޮތް ހަތަރު ދުވަހު، ހާއްސަކޮށް އުތުރާއި މެދު ރާއްޖެތެރޭގައި ވައިބާރުވެ، ކަނޑުތައް ގަދަވާނެ ކަމަށް މެޓުން ލަފާކޮށްފައި ވާތީ ކަނޑު ދަތުރުކުރާ މީހުން މޫސުމަށް ސަމާލުވުމަށް އެދޭ ކަމަށެވެ. އޮޑިވެރިންނާއި ކެޕްޓަނުންނާއި ފަޅުވެރިންނާއި އަދި ދަތުރުތަކުގައި ބައިވެރިވާ އާއިލާތަކާއި ރަހްމަތްތެރިން ވެސް މި ދަތުކުރެއްވެނީ ސަލާމަތާއި ރައްކާތެރި އުޅަނދެއްގައި ކަން ޔަގީންކުރެއްވުމަށް ފަހު ކަނޑުމައްޗަށް އެރުއްވުމަށް އިރުޝާދު ދެމެވެ،“ އެމްއެންޑީއެފުން ބުންޏެވެ.
ދަތުރުކުރާއިރު އެއްވެސް ކަމެއް ދިމާވެއްޖެ ނަމަ، ލަސްނުކޮށް ކޯސްޓްގާޑުގެ ހިލޭ ގުޅޭ ނަންބަރު 191 އަށް ގުޅަން ދިވެހި ސިފައިން އެދެ އެވެ. ދަތުރުތައް ފެށުމުގެ ކުރިން މޫސުމަށް ބަލައި، ރައްކާތެރި މަގެއް ހިޔާރުކޮށްގެން ދަތުރުކުރުމަަކީ ވެސް އެމްއެންޑީއެފުގެ އިލްތިމާސެކެވެ.
މެޓުން މިއަދު ބުނީ ރާއްޖެ ސަރަހައްދުގައި ހުޅަނގު މޫސުމުގެ ބާރުގަދަވެ، ކުރިއަށް އޮތް ހަތަރު ދުވަހު ވެސް މުޅި ރާއްޖެ އަށް ވިއްސާރަކުރާނެ ކަމަށާއި ބައެއް ރަށްތަކަށް ބޯކޮށް ވާރޭވެހޭނެ ކަމަށް ލަފާކުރެވޭ ކަމަށެވެ. އަދި ވައިބާރުވެ، ކަނޑުތައް ވެސް ގަދަވާނެ ކަމަށް ލަފާކޮށްފައިވެ އެވެ.
މީގެ ކުރިންވެސް ވަނީ މި ފަދަ އިލްތިމާސްތަކަށް ބެލުމެއްނެތި ދަތުރުކުރުމުން އުޅަނދުތަކަށާއި މުދަލަށް ބޮޑެތި ގެއްލުން ލިބިފައެވެ. އަދި ބައެއް ހާދިސާތަކުގައި މީހުންގެ ފުރާނަ ގެއްލި، ހިތާމަވެރި ހާދިސާތައް ވަނީ ހިނގާފައެވެ.
